Fréttir

Menntaskólinn við Hamrahlíð 55 ára 24. september

Í dag á Menntaskólinn við Hamrahlíð 55 ára afmæli. Skólinn var settur í fyrsta skipti 24. september 1966 af Guðmundi Arnlaugssyni fyrsta rektor skólans. Í ræðu Guðmundar kom fram að það hafi verið mikið tilfinningamál að stofna annan menntaskóla í Reykjavík. Í máli dr. Gylfa Þ. Gíslasonar menntamálaráðherra kom fram að það væru merk tímamót þegar nýr menntaskóli er tekin í notkun. Hann óskaði þess „að íslensk æska mætti sækja í skólann visku og þroska.“ Skólinn hefur svo sannarlega dafnað og vaxið á þessum rúmu fimm áratugum en í dag stunda rúmlega 1000 nemendur af 30 þjóðernum nám við skólann og er starfsfólk vel á annað hundrað. Það er spennandi að hugsa til þess hvernig skóli MH verður eftir önnur 55 ár.
Lesa meira

Hafragrauturinn

Í morgun mætti hafragrauturinn á Miðgarð við mikil fagnaðarlæti nemenda sem kláruðu hann upp til agna. Grauturinn verður í boði þriðjudaga, miðvikudaga og fimmtudaga frá kl. 9:50-10:10 og föstudaga 10:05 til 10:25. Nemendur eru hvattir til að koma með margnota ílát fyrir grautinn en þeir sem gera það ekki eiga að hreinsa vel úr pappaskálunum og setja þær í rusl fyrir pappír og skeiðarnar eru úr efni sem brotnar niður og mega því fara í lífrænu tunnuna.
Lesa meira

Norðurkjallari

Norðurkjallari er félagsaðstaða nemenda í MH og þar er hægt að vera og hafa það notalegt í góðra vina hópi. Stjórn NFMH hverju sinni, hefur umsjón með Norðurkjallara og sér um að halda utanum alla starfsemi sem þar fer fram. Í dag skrifaðu Elva María forseti nemendafélagsins og Steinn rektor undir samning þess efnis. Nokkrir viðburðir hafa nú þegar litið dagsins ljós í Norðurkjallara þetta skólaárið og í þessari viku er von á tveimur böllum í þessari fínu aðstöðu nemenda.
Lesa meira

Stjórnmál á Miklagarði

Á morgun, fimmtudaginn 9. september, verða skuggakosningar í MH. Af því tilefni fengu MH-ingar heimsókn frá fulltrúm flestra flokka sem bjóða fram í alþingiskosningum 25. september 2021. Nemendur sýndu þeim mikinn áhuga og mættu á Miklagarð í hádegishléinu og ræddu við þá um landsins gagn og nauðsynjar. Kjörstjórn skipa tveir kennarar og nemendur sem eru í stjórnmálafræðiáfanga. Vonandi fengu sem flestir svör við spurningum sínum og eru einhvers vísari um hvern skal kjósa í skuggakosningunum á morgun.
Lesa meira

Foreldrafundur

Í gærkvöldi var haldinn rafrænn foreldrafundur með foreldrum og aðstandendum nýnema haustsins 2021. Rektor flutti ávarp, Fríður náms-og starfsráðgjafi sagði frá stoðþjónustu skólans og Ásdís Lovísa tók alla í lífsleiknitíma og kynnti námið í MH. Næst söng kór Menntaskólans við Hamrahlíð 3 lög undir stjórn Hreiðars Inga og í þriðja laginu bættust nýjustu kórmeðlimirnir við og tóku undir. Eftir kórsögninn talaði Bóas sálfræðingur skólans og í lokin sagði Kristín Finndís frá foreldrafélaginu. Hægt er að horfa á streymið frá fundinum hér, ef einhver missti af.
Lesa meira

Saumastofa

Gamla myndlistarstofan hefur fengið nýtt hlutverk eftir kennslu á þriðjudögum og fimmtudögum. Þá breytist stofan í saumastofu nemenda MH. Þar hittast nemendur sem áhuga hafa á saumaskap og ýmiss konar handavinnu. Hópurinn hefur til umráða nokkrar saumavélar sem nemendafélagið hefur eignast og er ætlunin að sauma mark sitt á MH. Allir sem áhuga hafa eru velkomnir að bætast í hópinn.
Lesa meira

Íþróttakennsla

Íþróttakennsla hefur verið utanhúss það sem af er önninni en færist nú inn í hús frá og með miðvikudeginum 8. september. Við hvetjum nemendur til að mæta með viðeigandi íþróttafatnað og skó til notkunar innanhúss. Í MH er góð aðstaða til íþróttaiðkunar í þremur íþróttasölum. Stór salur fyrir bolta- og badmintonáfanga, minni salur fyrir jógaáfanga og lyftingaraðstaða fyrir lyftingar- og þrekáfanga. Einnig er í boði að taka fjallgönguáfanga og áfangann hjólað í skólann.
Lesa meira

Umsókn um jöfnunarstyrk

Jöfnunarstyrkur er námsstyrkur fyrir nemendur sem stunda nám á framhaldsskólastigi fjarri lögheimili og fjölskyldu. Opnað hefur verið fyrir umsóknir jöfnunarstyrks fyrir námsárið 2021-2022 og eru nemendur hvattir til að sækja um strax fyrir báðar annir námsársins. Umsóknarfrestur haustannar er til og með 15. október n.k. og vorannar til og með 15. febrúar n.k. Sótt er um á MITT LÁN og ISLAND.is með rafrænum skilríkjum. Ef nemendur óska eftir frekari upplýsingum er hægt að senda fyrirspurn á menntasjodur@menntasjodur.is. Nánar má lesa um jöfnunarstyrk á síðu Menntasjóðs.
Lesa meira

MH-ingar fá styrki úr Afreks- og hvatningarsjóði HÍ

Háskóli Íslands úthlutaði nýlega styrkjum úr Afreks- og hvatningarsjóði skólans. Að þessu sinni fengu 37 nemar styrk og voru 7 MH-ingar í þeim hópi. Við óskum þessum MH-ingum innilega til hamingju með styrkinn og erum stolt af þeim. Styrkþegarnir eru Bragi Þorvaldsson, Embla Rún Halldórsdóttir, Freydís Xuan Li Hansdóttir, Ragnheiður María Benediktsdóttir, Ragnhildur Björt Björnsdóttir, Steinunn Kristín Guðnadóttir og Uloma Lisbet Rós Osuala. Nánari upplýsingar má finna á heimasíðu HÍ.
Lesa meira

Raddprufur í kórinn

Í síðustu viku bauðst nemendum MH að skrá sig í raddprufur fyrir kór Menntaskólans við Hamrahlíð. Fyrsti dagurinn er í dag og mæta þá þeir sem skráðu sig í mánudagsprufurnar. Á miðvikudaginn verða svo raddprufur fyrir þá sem skráðu sig í miðvikudagsprufurnar. Ef einhver gleymdi að skrá sig þá má sá hinn sami senda Hreiðari Inga kórstjóra póst, fyrir fimmtudaginn, og athuga með tíma í raddprufu. Fyrstu tónleikar kórsins verða á fundi fyrir foreldra nýnema sem verður þriðjudaginn 7. september. Það verður gaman að fá að sjá og heyra í kórnum þá með nýja meðlimi innanborðs.
Lesa meira