Fréttir

Próftafla vorannar 2024

Próftafla vorannar 2024 er tilbúin. Nemendur geta skoðað hana í Innu og hér á heimasíðunni. Póstur á að hafa borist öllum nemendum þar sem hægt er að lesa um hvað þarf að gera ef nemendur eru í tveimum prófum á sama tíma eða sama degi. Endilega skoðið próftöfluna vel og ef þið þarfnist breytinga á henni þá sendið þið inn umsókn fyrir 8. apríl.  Tölvupóstinn má einnig nálgast hér á heimasíðunni.

Valvika

Valvika er hafin í MH og verður henni ýtt úr vör með áfangakynningum á sal í dag fimmtudag. Kynningin stendur yfir frá kl. 12:00 til 15:00 og þar gefst nemendum kostur á að skoða áfangaframboðið fyrir haustönn 2024. Kennarar og annað starfsfólk verður á staðnum og um að gera að skoða og spyrja spurninga um alla frábæru áfangana sem við erum með í boði.

MH-ingar í úrslit í efnafræðikeppni

23. Almenna landskeppnin í efnafræði fór fram í framhaldsskólum landsins miðvikudaginn 21. febrúar. Alls tóku 48 nemendur þátt, úr sex skólum. 14 efstu keppendum er boðið að taka þátt í úrslitakeppni sem verður haldin í Háskóla Íslands helgina 2.-3. mars næstkomandi. Þar eigum við í MH 3 keppendur sem fá tækifæri til að taka þátt og spreyta sig. Það er til mikils að vinna því fjórum efstu keppendum úrslitakeppninnar verður boðið að taka þátt í 7. Norrænu efnafræðikeppninni sem haldin verður í Noregi og strax að henni lokinni í 56. Alþjóðlegu Ólympíukeppninni í efnafræði sem haldin verður í Saudi Arabíu dagana 21.-30. júlí. 

MH komin í fjögurra liða úrslit Morfís

Í gær keppti ræðulið MH við ræðulið Kvennó um sæti í fjögurra liða úrslitum Morfís. Umræðuefni var "Lygar" og voru MH-ingarnir á móti en Kvennó með. Lið MH bar sigur úr býtum og óskum við þeim innilega til hamingju með það. MH-ingurinn Valgerður Birna var jafnframt kosin ræðumaður kvöldsins.

Lagningardagar

Lagningardagar hefjast á morgun. Þá liggur hefðbundin kennsla niðri í tvo daga og NFMH skipuleggur námskeið, fyrirlestra og aðra viðburði í samráði við kennara og stjórnendur. Gert er ráð fyrir virkri þátttöku kennara og nemenda í dagskrá lagningardaga. Nemendur, kennarar og utanaðkomandi aðilar hafa lagt mikinn metnað í kynningarnar/viðburðina sína. Dagskráin er sýnileg á síðun NFMH og þar er hægt að velja sér viðburð til að mæta á. Allar upplýsingar ættu nemendur að hafa fengið í tölvupóstum sem einnig má lesa hér á heimasíðunni. Við vonumst til að nemendur njóti þess að mæta í skólann hvort sem þau eru að njóta samvista við hvort annað eða taka þátt í skipulögðum viðburðum. Matsalan er ekki opin, en kórinn sér um veitingar og einnig mætir pylsuvagninn á svæðið á miðvikudaginn.

Fögnum fimm skrefum!

MH býður starfsfólki skólans kökusneið í dag í tilefni af því að hafa stigið 5. græna skrefið í samnefndu verkefni á vegum Umhverfisstofnunar en áfanganum var náð í desember síðastliðnum. Fimmta skrefið felst í því að stofnanir setji á fót eigið umhverfisstjórnunarkerfi og fagnar skólinn því að búa nú yfir slíku kerfi.

Opnun Sómalíu

Í dag opnaði Sómalía og streymdu nemendur í mat í hádeginu þar sem ýmislegt var í hitaborðinu. Matseðlar eru sýnilegir hér á heimasíðunni og þar er einnig hægt að skrá sig í mat fyrir eina viku í einu. Skráningu þarf að vera lokið fyrir kl. 16:00 á þriðjudögum, fyrir næstu viku á eftir. Langþráður draumur MH-inga er nú loksins orðinn að veruleika.

Matsala MH

Mánudaginn 15. janúar opnar matsala nemenda, Sómalía, í stærra og breyttu rými í austurenda Matgarðs. Matsalan hefur verið stækkuð og henni breytt úr sjoppu í mötuneyti. Hægt verður að kaupa heitan mat í hádeginu eða salatbar. Máltíðin kostar 1190 kr og salatbarinn kostar 600 kr. Hægt verður að kaupa 10 miða matarkort og þá kostar heita máltíðin 1000 kr. Nemendur skrá sig í mat í gegnum skráningareyðublað sem er sýnilegt hér á heimasíðunni eða á bak við QR kóða sem hangir uppi á Matgarði. Skráningu fyrir vikuna 15. - 19. janúar þarf að vera lokið fyrir kl. 16:00 í dag, svo hægt sé að kaupa inn og áætla fjölda gesta. Auður Þórhildur Ingólfsdóttir hefur verið ráðin sem matráður til viðbótar við Ellý og Soffíu sem allir þekkja. Áfram verður hægt að kaupa allt það sem áður var hægt að kaupa eins og kaffi, drykki og samlokur. Við vonum að nemendur taki mötuneytinu vel og verði ykkur að góðu.

Nýr áfangastjóri í MH

Á nýju ári tók Ásdís Birgisdóttir við stöðu áfangastjóra af Pálma Magnússyni sem lét af störfum um áramótin. Ásdís hefur unnið við menntakerfið frá 1995, þar af 10 ár í kennslu og frá 2005-2018 sem náms- og starfsráðgjafi við VMA, sem náms- og starfsráðgjafi í afleysingu við FB 2018-2019 og við MH frá 2019. Ásdís hefur á sínum ferli gengt ýmsum trúnaðarstörfum og situr m.a. í skólamálanefnd FF og í kjaranefnd Félags náms- og starfsráðgjafa. Við bjóðum Ásdísi velkomna til starfa í nýju hlutverki og þökkum jafnframt Pálma fyrir samstarfið síðustu áratugi.

Kynningarfundur fyrir nýnema vorannar

Nýnemar vorannar eru boðuð í skólann miðvikudaginn 3. janúar kl. 13:00. Fundurinn verður í stofu 11 og munum við taka á móti ykkur við innganga skólans og leiðbeina á réttan stað. Á kynningunni verður farið yfir helstu atriði sem skipta máli í byrjun annar. Öll hafði þið fengið stundatöflur og leiðbeiningar um hvernig virkja eigi Office 365 aðganginn.