Fréttir

Föstudaginn 24. október hefst langþráð haustfrí starfsfólks og nemenda MH. Við hvetjum ykkur öll til að nota fríið til að endurnærast fyrir lokatörnina fram að prófum sem hefjast 1. desember. Skrifstofan verður lokuð og opnum við aftur miðvikudaginn 29. október. Njótið haustfrísins.

BRÁTT MUN BIRTAN DOFNA - Kór Menntaskólans við Hamrahlíð (103) og Kammerkórinn Huldur (32) kvöddu haustið í gær með tónleikunum í Háteigskirkju. Sérstakir gestir voru einsöngvararnir Kristjana Stefánsdóttir og Hafsteinn Þórólfsson. Frumflutt var kórverk eftir Arvid Ísleif, Oddný Þórarinsdóttir kom fram sem einsöngvari og píanómeðleikari í lokaverki tónleikanna var Erlendur Snær Erlendsson. Uppselt var á tónleikana og voru gestir í skýjunum á eftir.

Hildur Ýr Ísberg var í viðtali í Reykjavík síðdegis þar sem hún ræddi um bókmenntalestur unga fólksins okkar og hversu mörg elska að lesa þessar bókmenntir. Nemendur í MH hafa sjálfir óskað eftir að fá að lesa krefjandi bókmenntir og finnst að það eigi að láta þau takast á við erfiða hluti. Hægt er að hlusta á viðtalið í heild sinni á netinu.

Malbikstöðin vinnur að gatnaviðhaldi á Hamrahlíð, á morgun, miðvikudaginn, 15. október - EF veður leyfir. Framkvæmdir hefjast kl. 14:00 en áætlað er að þeim ljúki um kl. 17:00 en verkið er háð veðri og gæti því riðlast aðeins. Lokað verður fyrir umferð um framkvæmdarsvæðið eins og meðfylgjandi lokunarplan sýnir. Opnað verður fyrir umferð eins fljótt og hægt er. Malbikunarstöðin biðst velvirðingar á öllum truflunum sem þetta kann að valda.

Embla Halldórsdóttir, nemandi við Menntaskólann við Hamrahlíð og öflug karatekona, vann gullverðlaun á afar sterku alþjóðlegu móti í Liège í Belgíu um síðustu helgi. Frammistaða Emblu var einstaklega glæsileg og í kjölfar mótsins tók hún þátt í æfingum með finnska og ungverska landsliðinu. Við sendum Emblu innilegar hamingjuóskir með frábæran árangur!

Skólameistarar framhaldsskólanna hittast reglulega og bera saman bækur sínar. Á eina slíka samveru mætti MH-ingurinn Vigdís Hafliðadóttir og söng og fór með gamanmál. Hún talaði fallega um skólann sinn og nefndi að hún hefði ekki getað hætt í MH þar sem hana langaði, að sem flestir kennarar skólans, fengju að kenna henni. Vigdís var forseti NFMH veturinn 2014 - 2015. Hún hefur gert ýmislegt síðan þá og meðal annars lokið prófi í heimspeki og hafið nám í pípulögnum. Spurningin hjá henni núna er sú, hvaða nafn fyrirtækið hennar eigi að bera, svo pípur og pælingar skíni í gegn.

MH-ingurinn og taekwondo-kappinn Guðmundur Flóki Sigurjónsson heldur áfram að standa sig vel á erlendum stórmótum og vann nú tvö alþjóðleg mót um nýliðna helgi.

Í vikunni verður lögreglan á sveimi í MH og er ástæðan sú að hún er að heimsækja alla hópa í lífsleikni nýnema. Tilgangurinn er að kynna samfélagslögregluna og fyrir hvað hún stendur. Nánar má lesa um samfélagslögregluna á síðu lögreglunnar.