Afreksíþróttaval

Afreksíþróttanemendur sem stunda nám við MH geta sótt um að íþróttaiðkunin verði hluti af náminu. Fyrirkomulagið er hugsað fyrir þá sem vilja ná langt í sinni íþróttagrein og skilgreina sig sem afreksíþróttafólk. Megin markmiðið er að nemandi hafi tækifæri til að tengja saman nám og íþróttaiðkun og tileinka sér um leið aga og skipulag til að standa sig vel í námi og afreksíþróttum.

 

Íþróttagreinin sem viðkomandi nemandi stundar þarf að vera viðurkennd af Íþróttasambandi Íslands (ÍSÍ) og íþróttafélagið aðili að sérsambandi innan ÍSÍ.

 

Iðkun nemanda í afreksíþróttum getur numið allt að 25 einingum, þ.e. einingar í afreksíþróttum geta komið í stað eininga í líkamsræktaráföngum og frjálsu vali á brautum skólans. Athugið að valeiningafjöldi er mismunandi eftir brautum, 10-25 einingar.

Nemendur með afreksíþróttaval þurfa alltaf að taka fyrsta líkamsræktaráfangann í MH, LÍKA2AA01. Nýnemar á hverju hausti byrja því ekki í afreksíþróttavalinu fyrr en á annarri önn.

 

Nemandi sem sækir um afreksíþróttaval þarf að fylla út meðfylgjandi eyðublað (merkja) og skila því til kennara áfangans. Í umsókn þurfa að koma fram upplýsingar um hvaða íþrótt nemandinn æfir og umfang æfinga og keppni á viku (Eyðublað/Samningur).

 

Þjálfari þarf einnig að skila inn rafrænu meðmælabréfi í gegnum hlekk sem hann fær sendan frá fagstjóra í upphafi annar.

 

Að baki einni einingu eru 18-24 klukkustundir og geta nemendur fengið að hámarki 5 einingar á önn fyrir afreksíþróttaiðkun. Til þess að uppfylla kröfur um afreksíþróttaval þarf nemandi að æfa að lágmarki 6 klst á viku.

 

Í upphafi annar eru nemendur með afreksíþróttaval boðaðir á fund með fagstjóra í líkamsræktar þar sem farið er yfir skipulag afreksíþrótta. Skyldumæting er á 3-4 fræðsluerindi  yfir önnina auk kynningarfundar.