Fréttir

Í dag gafst útskriftarefnum skólans kostur á að kveðja kennara, starfsfólk og samnemendur. Dagurinn byrjaði með morgunverði á Matgarði í boði útskriftarefna, næst var skemmtun á sal fyrir alla og að lokum fóru nemendur út í vorið og gerður sér glaðan dag. Til hamingju með síðasta kennsludaginn öll og gangi ykkur vel í prófunum.

Í gær var tilkynnt um val á íþróttafólki ársins hjá Knattspyrnufélagi Reykjavíkur. Skemmst er frá því að segja að íþróttakarl ársins var valinn taekwondo-maðurinn og MH nýneminn Guðmundur Flóki Sigurjónsson en það hefur ekki farið fram hjá lesendum MH síðunnar að hann hefur náð frábærum árangri að undanförnu.

Þann 13. mars s.l. var haldinn aðalfundur fulltrúaráðs Nemenda- og hollvinasamtaka Menntaskólans við Hamrahlíð (NHMH). Aðalfund skal halda á þriggja ára fresti og kjósa samtökunum fimm manna stjórn úr hópi fulltrúaráðs en það skipa fyrrverandi forsetar Nemendafélags MH eða staðgenglar þeirra. Félagsmenn NHMH eru aftur á móti allir útskrifaðir nemendur frá MH, starfsmenn skólans fyrrverandi og núverandi, sem og fyrrverandi nemendur, sem ekki luku stúdentsprófi en óska eftir því að verða teknir upp á félagaskrá.

Innritun í framhaldsskóla stendur yfir frá 25. apríl til og með 10. júní 2025. Sótt er um framhaldsskóla í gegnum Ísland.is, island.is/umsokn-um-framhaldsskola og þar eru allar helstu upplýsingar um umsóknarferlið.

Junior Achievement á Íslandi stendur á hverju ári fyrir fyrirtækjasmiðju Ungra frumkvöðla en þar vinna nemendur að ýmsum sjálfstæðum verkefnum þar sem þau sýna frumkvæði og stofna fyrirtæki utan um vöru eða þjónustu. Einn liður í því verkefni er að kynna vöruna í Smáralind á svokallaðri vörumessu sem fór fram um síðustu helgi.

Áróra Líf Sigurþórsdóttir sigraði söngkeppni Óðríks Algaula sem haldin var í febrúar og keppir fyrir hönd NFMH/MH í söngkeppni framhaldskólanna sem verður haldin næstkomandi laugardag 12. apríl í Háskólabíói. Áróra Líf mun syngja lagið Óskarsverðlaunatár eða Oscar winning tears með Raye. Við hvetjum nemendur til að kaupa miða á keppnina og styðja Áróru Líf áfram, stuðningur skiptir svo miklu máli. Keppnin verður einnig sýnd í beinni á RÚV kl 19:45 og hvetjum við öll til þess að fylgjast með keppninni. Miðasala er inn á tix.is (https://tix.is/event/19285/songkeppni-framhaldsskolanna-2025)

Í síðustu viku fór fram sannkölluð tónlistarveisla á vegum Menntaskóla í tónlist í Hörpu. Dagskráin stóð frá morgni til kvölds dagana 31. mars til 2. apríl og sýndu nemendur snilldartakta. Útskriftarnemendur MÍT sem einnig stunda bóklegt nám í MH sýndu þar afrakstur síðustu ára úr námi sínu við MÍT. Sannkölluð tónlistarveisla. Á myndinni má sjá Snævar Örn Kristmannsson sem er að ljúka námi af stúdentsbraut MÍT með áherslu á klassískan gítar. Til hamingju öll með árangurinn.

Við vekjum athygli allra á úrslitum í Músíktilraunum sem fóru fram um helgina. MH-ingar voru á meðal þeirrra sem sýndu þar snilldartakta og tóku með sér nokkur verðlaun. Til hamingju með ykkur. Nánari fréttir af Músíktilraunum unga fólksins má lesa hér.

Það var hvorki langferðabíll né rúta heldur Nimbus 2000 sem tók nemendur í galdrabókmenntum alla leið á Galdrasafnið á Hólmavík og til baka á einum degi. 25 galdranemendur MHogwarts tóku flugið frá MH á laugardagsmorgni og slúttuðu annasömum galdraáfanga með ferð á alvöru galdraslóðir. Hólmavík tók á móti hópnum með blankalogni og spegilsléttum sjó, það var töfrum líkast. Nemendur fengu frábæra leiðsögn safnstjórans Önnu Bjargar Þórarinsdóttur og er gaman að geta tvinnað saman áhugamál og nám á þennan hátt.

Sif Bjarnadóttir fyrrverandi dönskukennari í MH verður jarðsungin frá Háteigskirkju í dag föstudag kl. 13:00. Skrifstofan verður því lokuð eftir hádegi í dag. MH-ingar senda fjölskyldu Sifjar sínar dýpstu samúðarkveðjur.