Fréttir

Lagningardagar tókust mjög vel og þökkum við öllum sem lögðu hönd á plóg. Sérstaklega viljum við þakka lagningardagaráði fyrir alla þá vinnu sem þau lögðu í þetta - takk öll fyrir skemmtilega daga. Í dag opnaði miðannarmat í Innu sem gefið er nemendum fæddum 2005 eða seinna. Upplýsingar um miðannarmatið má lesa í pósti til aðstandenda. Á miðvikudaginn mun hafragrauturinn birtast á Miðgarði og er vitað með vissu að margir bíða spenntir eftir því að borða grautinn og skola svo grautarskálarnar í skolvaskinum sem er á Matgarði. Valvika hefst svo á föstudaginn með valtíma sem er sérstaklega ætlaður nýnemum haustannar.

Lið MH í Gettu betur er komið í undanúrslit eftir að hafa sigrað lið Kvennaskólans í átta liða úrslitum. Lið skólans mætir liði Fjölbrautaskólans í Garðabæ föstudaginn 4. mars í beinni útsendingu á RÚV. Liðið skipa skipa Una Ragnarsdóttir, Ísleifur Arnórsson og Júlía Helga Kristbjarnardóttir. Við óskum þeim innilega til hamingju með árangurinn og munum fylgjast spennt með viðureigninni nk. föstudag.

Lagningardagar hefjast á morgun 24. febrúar og standa í tvo daga. Nemendur þurfa að safna stimplum fyrir mætingu á viðburði, á stimplakort sem þeir fá upp í skóla. Í ár þurfa nemendur að fá 18 stimpla í heildina til að fá mætingu. Gera má ráð fyrir að ná 9-12 stimplum á fimmtudeginum og 6-9 stimpla á föstudeginum. Það þarf að mæta báða dagana. Nemendur skrá sig á heimasíðu NFMH og þurfa að passa upp á að hafa nægan tíma á milli fyrirlestra svo þeir komist tímanlega á þá. Kórinn verður með veitingasölu á Matgarði. Munið að þetta á að vera skemmtilegt uppbrot fyrir alla, hvort sem þeir eru að halda fyrirlestur eða mæta á fyrirlestra. Góða skemmtun!

Lagningardagar eru þemadagar Menntaskólans við Hamrahlíð. Á lagningardögum halda nemendur fyrirlestra fyrir samnemendur og starfsfólk tekur einnig þátt í að vera með fyrirlestra. Einnig koma utanaðkomandi aðilar til að skemmta eða halda fyrirlestra. Lagnó í ár er dagana 24. - 25. febrúar. Nemendur þurfa að safna stimplum fyrir mætingu á stimplakort sem þeir fá í skólanum fimmtudaginn 24. febrúar. Í ár þurfa nemendur að fá 18 stimpla í heildina til að fá mætingu. Dagskráin er fjölbreytt og hér má skoða það sem verður í boði í ár. Skráning hefst eftir helgina og verður hlekkur á hana settur á heimasíðu NFMH. Nánari upplýsingar koma á mánudaginn 21. feb.

Föstudaginn 18. febrúar mun Menntaskólinn við Hamrahlíð flytja Microsoft skýjageira sinn yfir í Menntaskýið. Menntaskýið er verkefni á vegum íslenska ríkisins þar sem Microsoft hugbúnaður er sameinaður í eina miðlæga einingu. Innleiðing á þessu verkefni hefst kl. 12:00 föstudaginn 18. febrúar og verður lokið mánudaginn 21. febrúar. Klukkan 12:00, föstudaginn 18. febrúar, verður lokað á innskráningar á MH aðganga, þ.e. Office365 aðganginn. Þegar nemendur og starfsfólk skráir sig inn í fyrsta skipti, eftir flutninginn, þarf að fylgja leiðbeiningum sem settar verða á MH síðuna. Það skiptir miklu máli að allir skoði strax hvort þeir eigi einhver skjöl í FORMS eða SWAY sem þarf að afrita fyrir flutninga. Allar leiðbeiningar má finna hér og munum við gera okkar besta til að halda öllum upplýstum. Nánari upplýsingar koma síðar og allir þurfa að fylgjast vel með.

Vegna versnandi veðurspár og mikillar ofankomu höfum við ákveðið að fella niður kennslu eftir hádegi í dag 14. febrúar. Póstur um þetta hefur verið sendur til allra og vonum við að allir komist heim og við sjáumst í fyrramálið. ___ In light of bad weather forecast this afternoon 14th of February, we will cancel all classes from 12:55. I hope everyone gets home safe and we will see you all tomorrow at school.

Reglur varðandi grímuskyldu í skólum hafa verið rýmkaðar og núna er leyfilegt að taka grímur af inni í kennslustofum. Þar sem reglur um sóttkví og einangrun hafa líka verið rýmkaðar þá er enn nauðsynlegra að allir passi vel upp á persónulegar sóttvarnir. Munum að spritta okkur og nota grímu þar sem það á við.

Í ljósi rauðrar veðurviðvörunar Veðurstofunnar og Almannavarna hefur verið ákveðið að staðkennsla hefjist ekki fyrr en eftir hádegi á morgun, 7. febrúar, þ.e. kl. 12:50. Nemendur hafa fengið tölvupóst með nánari upplýsingum. Við munum setja inn fréttir á heimasíðuna ef eitthvað breytist.

Lagningardagar nálgast, en það eru dagar þar sem hefðbundin kennsla liggur niðri og ýmislegt annað er gert sér til dundurs. Lagningardagar verða 24. og 25. febrúar. Þeir nemendur sem vilja vera með viðburð á Lagningardögum geta sótt um það á þar til gerðri umsóknarsíðu sem lagningardagaráð NFMH sér um. Nánar má lesa um Lagningardaga hér á heimasíðunni.