Fréttir

Starfsfólk og nemendur fóru út í góða veðrið í hádeginu í dag og tíndu rusl af lóð skólans. MH hefur tekið þátt í Stóra plokkdeginum undanfarin ár en það er liður í aðgerðum fræðsluáætlunar í umhverfismálum. Vorveðrið lagðist á sveif með duglegum MH-ingum og sá til þess að öll gátum við notið útiverunnar og unnið þarft verk í leiðinni.

Nemendur á fyrra árinu í IB fóru á Þingvelli með kennurum sínum í efnafræði, eðlisfræði og líffræði og unnu þverfaglegt verkefni á fallegum degi í fallegri náttúru. Í ferðinni voru nemendur að velta fyrir sér loftslagsbreytingum og áhrifum þeirra á vistkerfi Þingvalla. T.d. voru þau að skoða lífríkis Þingvallavatns, mengun á svæðinu, ferðaþjónustu í héraðinu, jarðvarmavirkjunar í kringum svæðið, náttúrvernd og ýmislegt fleira. Verkefnið kallast CSP (Collaborative sciense project) og munu nemendur kynna niðurstöður sínar á Miðgarði 23. apríl milli 16:00 og 17:00. Markmiðið er að allir nemendur árgangsins vinni saman að því að skoða "Global issue in local context". Markmið skv. fyrirmælum IB er að hafa ALLA nemendur árgangsins að vinna saman til að skoða "Global issue in local context". Nemendur áttu að velja sér rannsóknarspurningu í þessu samhengi og vinna saman í litlum hópum.

Í hádeginu 18. apríl var myndbandið „Samþykki, mörk og náin samskipti“ sýnt nemendum og starfsfólki skólans. Höfundar myndbandsins eru Sólborg Guðbrandsdóttir og Þorsteinn V. Einarsson. Viðburðinum var stjórnað af nemendum og ávarp fluttu Urður Bartels nemandi og Ásmundur Einar Daðason mennta- og barnamálaráðherra. Auk þeirra komu fram jafnréttisfulltrúi skólans og fulltrúar feminstafélags NFMH, Emblu. Myndbandið fjallar um samþykki, mörk og náin samskipti nemenda í framhaldsskólum. Efnið er í samtalsformi og út frá reynsluheimi og orðfæri nemendanna og var því vel tekið af MH-ingum.

Við getum ekki hætt að tala um söngleikinn okkar, Söngvaseið. María Hjörvar og Sara Gunnlaugsdóttir, oddvitar leikfélagsins mættu í bítið í morgun og sögðu frá söngleiknum sem er að gera allt vitlaust þessa dagana. Nú þegar hefur verið uppselt á 3 fyrstu sýningarnar og er að seljast upp á þá fjórðu sem er á fimmtudaginn. Sýningin er alveg stórkostleg upplifun og ótrúlegir hæfileikar sem eru þarna á ferð.

16. apríl hefst nýtt Discover EU happdrætti. Með DiscoverEU passanum fá 50 íslensk ungmenni tvisvar á ári frían Interrail passa og flug til Evrópu. Síðustu tvö ár hafa 200 Íslendingar unnið í happdrættinu.

Í gær fóru fram kosningar til embætta í nemendafélagi MH, NFMH. Niðurstöðu kosninga í kjarnasjórn eru þannig að nýr forseti er Arnaldur Halldórsson, nýr varaforseti er Benedikt Freyr Þorvaldsson, nýr gjaldkeri er Valgerður Birna Magnúsdóttir og nýr markaðsstjóri er Helga Birna Hauksdóttir. Við óskum þeim til hamingju með kosninguna og hlökkum til að vinna með ykkur næsta vetur.

Í næstu viku munu námsráðgjafar bjóða upp á námskeið í prófundirbúningi fyrir nemendur í MH. Nemendur geta valið um þrjú námskeið, þriðjudaginn16. apríl, miðvikudaginn 17. apríl eða fimmtudaginn 18. apríl.

Leikfélag Menntaskólans við Hamrahlíð og Menntaskólinn í tónlist kynna með stolti söngleikinn Söngvaseið. Að verkinu kemur fjöldinn allur af nemendum beggja skóla ásamt leikstjóra, aðstoðarleikstjóra/danshöfundi, tónlistarstjóra og kórstjóra. Þessi ástríka sýning er stærsta sýning MH í fleiri áratugi og er fullkomin fyrir alla aldurshópa. Miðasala er inni á Tix.is og geta NEMENDUR MH OG MÍT KEYPT MIÐA Á AFSLÆTTI.

Páskafríið er hafið og stendur til og með 2. apríl. Skrifstofan verður lokuð og opnar ekki aftur fyrr en kl. 8:30 miðvikudaginn 3. apríl. Við hvetjum ykkur til að njóta páskanna eins og hægt er og safna orku fyrir síðustu vikurnar sem eftir eru af önninni. Við vonumst til að sjá ykkur öll hress eftir páska, gleðilega páska.

Gettu betur lið skólans gladdi okkur mikið í kvöld þegar þau unnu það frækilega afrek að sigra Gettu betur. Liðið hefur lagt á sig mikla vinnu og uppskar glæsilegan sigur í kvöld þegar þau unnu lið MR í skemmtilegri og fjölbreyttri keppni. Til hamingju kæra Gettu betur lið og þjálfarar og varamenn. Atli, Una og Hálfdan þið eruð hetjurnar okkar og við óskum ykkur innilega til hamingju.