Fréttir

Síðastliðinn föstudag voru nemendur á lokaári í IB með myndlistarsýningu þar sem þau prófuðu að sýna verkin sín í því skyni að undirbúa sig undir að halda stærri sýningu í vor. Sýningin var haldin í einum af íþróttasölum skólans og stóðu listamennirnir sig með prýði. Thank you for a good show.

Lið MH sigraði lið Fjölbrautaskóla Suðurlands í annarri umferð Gettu betur. Fóru leikar þannig að lið MH hlaut 30 stig á móti 17 stigum Sunnlendinga. Lið MH skipa Ari Hallgrímsson forseti NFMH, Júlía Helga Kristbjarnardóttir og Ísleifur Arnórsson. Við óskum þeim enn og aftur innilega til hamingju með sigurinn. Liðið er núna búið að tryggja sig inn í 8 liða úrslit sem fara fram í sjónvarpinu á næstu vikum.

Töflubreytingum lýkur alveg í dag mánudaginn 11. janúar. Eftir það hafa nemendur tækifæri til 22. janúar til að segja sig úr áfanga eftir samtal við náms- og starfsráðgjafa, námstjóra eða áfangastjóra. Við þá úrsögn kemur úrsögnin fram á ferli nemenda og telst sem seta í áfanga. Eftir að 5 vikur eru liðnar af önninni þá mun áfangastjóri taka stöðuna á ástundun nemenda og fara yfir stöðuna í samráði við kennara viðkomandi nemenda. Nánar má lesa um skólasóknarreglur á heimasíðu skólans.

Í MH er staðkennsla fyrir hádegi mánudaga til fimmtudaga. Í gær rölti Bóas, sálfræðingur skólans, um skólann og ræddi við nemendur, kennara og rektor og hægt er að hlusta á upptökuna í dótakassanum. Í dag voru nemendur hjá Ásdísi Þórólfsdóttur að læra að dansa Salsa í valáfanga í spænsku. Tilþrifin má sjá á myndinni sem fylgir fréttinni.

Þriðjudaginn 5. janúar keppti lið MH í Gettu betur en andstæðingurinn var lið Framhaldsskólans á Húsavík. Leikar fóru þannig að lið MH sigraði með 32 stigum gegn þremur stigum Húsvíkinga. Lið MH skipa Ari Hallgrímsson forseti NFMH, Júlía Helga Kristbjarnardóttir og Ísleifur Arnórsson. Við óskum þeim innilega til hamingju með sigurinn.

Kennsla hefst í MH miðvikudaginn 6. janúar og hefst fyrsti tíminn kl. 09:00. Nemendur mæta í stofur skv. stundaskrá hvers og eins. Í byrjun tímans verður ávarpi rektors streymt í allar kennslustofur. Ávarpið og nánari lýsingu á fyrstu dögunum má lesa undir Covid-19 hnappnum. Lokað verður fyrir töflubreytingar í gegnum Innu í kvöld (5. janúar) og ef einhver þarf enn á töflubreytingu að halda þá eru námstjórar við eftir tímann kl. 10:15, 6. janúar, og geta aðstoðað. Við bíðum spennt eftir að fá ykkur í hús.

Nemendur sem eru að hefja nám í MH, vorið 2021, eru boðaðir á kynningarfund í skólanum þriðjudaginn 5.janúar kl. 13:00. Kynningarfundurinn fer fram í hátíðarsal skólans. Þar munu rektor, nokkrir starfsmenn skólans og umsjónarkennarinn ykkar, taka á móti ykkur og fara yfir helstu atriðin sem skipta máli við skólabyrjun.

Stundatöflurnar eru tilbúnar í Innu og sýnilegar þeim sem greitt hafa skólagjöldin. Nýir greiðslulistar eru keyrðir inn að morgni dags virka daga og opnast stundatöflur í kjölfarið. Nýnemar vorannar geta sótt um töflubreytingar hjá námstjórum eftir kynningarfundinn 5. janúar. Aðrir nemendur sem telja sig þurfa töflubreytingu eiga að sækja um sem allra fyrst í gegnum Innu. Leiðbeiningar um það eru í Innu undir Aðstoð. Breyttar töflur birtast í Innu eftir því sem þær vinnast. Ef töflubreytingu er hafnað þá er það oftast vegna þess að hópar eru fullir. Ekki er hægt að sækja um P-áfanga í töflubreytingum. Þeir sem hafa sótt um P-áfanga ættu að fá þá inn eftir fyrstu kennsluvikuna. Hægt er að senda inn beiðni um töflubreytingu til og með þriðjudeginum 5. janúar. Eftir það þarf að fara til námstjóra eða áfangastjóra til að breyta töflum. Kennsla hefst samkvæmt stundaskrá miðvikudaginn 6. janúar kl. 9:00. Námsgagnalisti/bókalisti er aðgengilegur í Innu. 

Skrifstofan skólans verður lokuð frá og með 23. desember til og með 3. janúar 2021. Þann 4. janúar verður skrifstofan opin frá 10:00-15:00. Nýnemar vorannar koma í skólann 5. janúar kl. 13:00. Kennsla hefst miðvikudaginn 6. janúar kl. 9:00 skv. stundaskrá en nánari upplýsingar verða birtar á heimasíðunni þegar nær dregur en stundatöflur nemenda verða birtar 30. desember. Við þökkum fyrir árið sem er að líða og óskum öllum gleðilegra jóla.

Í dag voru brautskráðir 116 nemendur frá Menntaskólanum við Hamrahlíð af fjórum námsbrautum. Að þessu sinni útskrifuðust flestir af opinni braut eða 80 nemendur, 22 af náttúrufræðibraut, 11 af félagsfræðabraut og 3 af málabraut. Brautskráningin fór fram í samræmi við sóttvarnarreglur. Nemendur gengu í 10 manna hópum úr kennslustofum inn á Miklagarð til að taka á móti skírteinum. Athöfninni var streymt svo að fólk heima í stofu gæti horft á. Tveir nemendur voru brautskráðir með ágætiseinkunn á stúdentsprófi, þ.e. vegin meðaleinkunn var yfir 9,00. Hekla Martinsdóttir Kollmar var dúx skólans. Hún útskrifaðist af opinni braut með 9,33 í meðaleinkunn. Hekla hlaut einnig verðlaun fyrir ágætan námsárangur í frönsku og íslensku. Semidúx var Ragnheiður M. Benediktsdóttir sem útskrifaðist af opinni braut með 9,24 í meðaleinkunn. Hún hlaut auk þess viðurkenningu fyrir ágætan námsárangur í dönsku og íslensku. Þess má geta að dúx og semidúx voru með íslensku sem fyrstu kjörgrein á opinni braut. Aðrir sem hlutu verðlaun voru: Eygló Rut Hákonardóttir hlaut verðlaun fyrir ágætan námsárangur félagsgreinum. Maia Snorradóttir hlaut verðlaun fyrir ágætan námsárangur í spænsku. Ragnheiður Helga Guðjónsdóttir hlaut verðlaun fyrir ágætan námsárangur í líffræði. Sylvía Frans Skúladóttir hlaut verðlaun fyrir ágætan námsárangur í þýsku og jarðfræði. Ávörp fyrir hönd nýstúdenta fluttu þau Jökull Ingi Þorvaldsson og Móeiður Una Ingimarsdóttir. Nýstúdentar fluttu tónlist undir stjórn Hreiðars Inga Þorsteinssonar. Myndir og fréttir frá athöfninni er að finna inni á facebooksíðu MH. Við óskum öllum gleðilegra jóla og nýstúdentum til hamingju með áfangann.