Fréttir

MH er skipt upp í 5 sóttvarnarhólf og í flestum tilfellum eru lokaðar dyr sem skýra hvar hólf endar. Það er hins vegar ekki mögulegt á Matgarði þar sem vanalega er stórt og opið rými. Matgarður er núna tvískiptur og þar með nýju salernin líka. Við viljum ítreka við nemendur að virða þessar lokanir og hugsa um af hverju við erum að þessu. Nemendur þurfa því að skoða vel í hvaða stofu þeir eiga að mæta svo þeir viti í hvaða sóttvarnarhólfi þeir eiga að vera.

Í dag og alla þessa viku eru nemendur að mæta í skólann frá kl. 8:10 til 12:35 skv. sinni stundatöflu. Skólanum hefur verið skipt upp í 5 sóttvarnarhólf og þurfa nemendur að vera duglegir að kynna sér inn um hvaða innganga þeir eiga að fara og í hvaða rými þeir mega vera í eyðum. Kennsla eftir hádegi fer fram í rafrænum heimi skv. skipulagi hvers kennara í hverjum áfanga fyrir sig. Í viku 5 verður þessu skipulagi snúið við og rafræn kennsla verður fyrir hádegi en nemendur mæta í MH eftir hádegi. Allar nánari upplýsingar eru aðgengilegar undir Covid-hnappnum.

Kór Menntaskólans við Hamrahlíð hélt sína fyrstu kóræfingu í skólanum í dag. Kórstjórinn, Hreiðar Ingi Þorsteinsson, hefur staðið í ströngu í inntökuprófum undanfarna daga og tók opnum örmum á móti hópnum í dag. Salurinn var vel nýttur og fjarlægðarmörk virt. Við bíðum spennt eftir að heyra fagra tóna frá kórnum og óskum nýjum meðlimum ti hamingju með að vera komin í kórinn okkar.

MH skilaði einu bretti af skjalaöskjum til Þjóðskjalasafns í dag. Öskjurnar innihéldu ýmis gögn úr nemendaskrá skólans, m.a. gamla handskrifaða spjaldskrá, vitnisburð um verklag liðinnar tíðar. Fyrirferðarmest voru gögn nemenda sem stunduðu nám í öldungadeild á einhverjum tímapunkti en brautskráðust ekki úr MH. Öldungadeildin var starfrækt á árunum 1972-2014. Vanti einhverja „öldunga“ upplýsingar um námsferil sinn verða þeir því að leita til Þjóðskjalasafns hér eftir.

Umsóknarfrestur um jöfnunarstyrk vegna haustannar 2020 er til 15. október næstkomandi n.k. Nemendur geta sótt um jöfnunarstyrkinn með rafrænum skilríkjum eða með Íslykli á heimasíðu Menntasjóðs www.menntasjodur.is eða island.is.

Í næstu viku fara fram, á Miklagarði, hin árlegu inntökupróf í Kór Menntaskólans við Hamrahlíð. Skipulagið eru sem hér segir: - Mánudagurinn 7. sept: Skráning í inntökupróf kl. 16:30 - 18:00. - Þriðjudagurinn 8. sept: Inntökupróf I kl. 16:30 - 18:00. - Miðvikudagurinn 9. sept: Inntökupróf II kl. 16:30 - 18:00. - Föstudagurinn 11. september: Fyrsta kóræfingin kl. 14:20. Nánari upplýsingar inn á: https://www.facebook.com/events/248432269617999/ Áhugasamir eru hvattir til að mæta en í fyrra komust færri að en vildu.

Fimm MH-ingar fengu styrk úr Afreks- og hvatningarsjóði stúdenta Háskóla Íslands en styrkurinn var afhentur við hátíðlega athöfn 31. ágúst sl. Styrkþegar að þessu sinni voru Anna Magnúsdóttir Eirúnardóttir, Berglind Erna Tryggvadóttir, Margrét Björk Daðadóttir, Nanna Kristjánsdóttir og Sóley Halldórsdóttir. Við óskum þeim innilega til hamingju með styrkinn. Myndir frá athöfninni má sjá á facebooksíðu MH.

Námsver MH er á 1. hæð í stofu 46 og er opið frá kl. 10-14 fyrst um sinn. Gengið er inn í hólf 6. Þar geta nemendur fengið stuðning við heimanám í flestum námsgreinum. Allir nemendur skólans eru velkomnir meðan húsrúm leyfir en gæta þarf að 1 metra fjarlægð milli nemenda.

Í dag mæta nemendur í MH í tíma sem hefst kl. 14:15. í mörgum tilfellum þarf að skipta hópum í tvennt og þá mætir fyrri hópurinn kl. 14:15 en seinni kl. 15:20. Kennarar hafa sent nemendum upplýsingar um hvernig þessu er háttað í þeirra áföngum. Þegar nemendur koma í skólann þurfa þeir að kynna sér inn um hvaða inngang þeir eiga að fara og muna eftir að virða 1m relguna inni í MH.

Nýnemar eru mættir til að kynnast því hvernig við ætlum að hafa þetta fyrstu þrjár vikurnar á önninni. Fyrri hópurinn mætir kl. 10:00 og seinni hópurinn mætir kl. 13:00. í framhaldi af hverjum tíma fyrir sig mun nemendastjórnin hitta þau á sal og kynna starfsemi sína fyrir þeim.