Fréttir

Bjartasta vonin í MH

Guðlaug Sóley Höskuldsdóttir nemandi á fyrsta ári í MH fékk verðlaunin Bjartasta vonin á íslensku tónlistarverðlaununum sl. laugardag. Guðlaug Sóley sem kemur fram undir nafninu Gugusar var einnig tilnefnd til verðlauna fyrir bestu raftónlistarplötuna. Við óskum Guðlaugu Sóleyju innilega til hamingju með verðlaunin og tilnefninguna.

Sjáumst á mánudaginn 19. apríl- See you all on Monday

Næsta mánudag, 19. apríl, mætum við öll í MH og tökum staðkennsluna upp aftur. Að vísu fellur kennsla niður fimmtudaginn 22. apríl en þá er sumardagurinn fyrsti. Skólinn er tilbúinn og vonandi allir nemendur líka og við tökum þessar síðustu tvær kennsluvikur með trompi. Góða helgi og sjáumst á mánudaginn.

Fleiri sófar

Þrír nýir sófar bættust við í Norðurkjallara í dag og bíða spenntir eftir að þjóna nemendum. Steinn rektor og Pálmi áfangastjóri nutu þess að setjast í þá eftir að hafa borið þá inn í skólann. Til hamingju með fínu sófana.

Góður árangur í úrslitum landskeppninnar í eðlisfræði

Lið MH í úrslitum framhaldsskólaleika Rafíþróttasamtaka Íslands

Lið MH er komið í úrslit í framhaldsskólaleikum Rafíþróttasamtaka Íslands en liðið mætir liði Tækniskólans nk. fimmtudag. Lið MH skipa Guðbjartur Daníelsson, Ísak Jón Einarsson, Jakob Viðar Sævarsson, Katrín Ýr Rósudóttir, Rakel Ása Ingólfsdóttir, Unnar Freyr Sigurðarson, Bjarni Smári Nordby Bjarnason, Karólína Ósk Erlingsdóttir, Stefán Arnar Einarsson, Birkir Steinarsson, Knútur Karl Víðisson og Kristinn Halldórsson. Alls tóku fjórtán skólar þátt í keppninni sem er með útsláttarfyrirkomulagi. Leikurinn verður í beinni útsendingu á Stöð 2 eSport. Við óskum liðinu góðs gengis í úrslitum.

Rafræn kennsla út vikuna / Teaching will be online for the next few days.

Kennslan í MH verður rafræn frá og með miðvikudeginum 14. apríl til og með föstudeginum 16. apríl. Kennarar munu gefa nemendum allar leiðbeiningar í gegnum Innu og halda uppi kennslu í rafrænu umhverfi. Þetta eru varúðarráðstafanir sem við teljum rétta að grípa til. Bókasafnið er opið frá 8:10 til 16:00 ef nemendur þurfa að nálgast bækur eða prenta út. Náms- og starfsráðgjafar eru til viðtals í gegnum tölvupóst eða síma.

Úrslit í vegglistasamkeppni nemenda

Nýlega fór fram samkeppni milli nemenda MH um vegglistaverk á gang milli Norðurkjallara og Undirheima. Fjöldi verka barst í samkeppnina og voru verk eftir eftirtalda nemendur valin: Noru Evu Sigurdsson, Hannes Hreim Arason Nyysti, Freyju Stígsdóttur, Elísabetu Maríu Hákonardóttur, Kötlu Björgu Sigurjónsdóttur og Auði Grétu Þórisdóttur. Við óskum þessum nemendum innilega til hamingju með verkin og viðurkenninguna. Í dómnefnd sátu fulltrúar nemenda, kennara og stjórnenda. Alls bárust rúmlega 50 verk í samkeppnina sem staðfestir enn og aftur sköpunarkraftinn sem ríkir á meðal nemenda MH.

Glæsilegur árangur í úrslitum landskeppninnar í efnafræði

MH-ingurinn Oliver Sanchez sigraði í úrslitum landskeppni í efnafræði en hann sigraði einnig forkeppnina sem fór fram fyrir skömmu. MH-ingurinn Telma Jeanne Bonthonneau varð í fjórða sæti og óskum við þeim innilega til hamingju með þennan glæsilega árangur. Oliver stundar nám á IB-braut og Telma Jeanne á náttúrufræðibraut. Fjórum stigahæstu keppendum er boðin þátttaka í íslenska landsliðinu í efnafræði 2021. Þeir sem þiggja sæti munu taka þátt í 5. Norrænu efnafræðikeppninni sem (vonandi) verður haldin í Reykjavík dagana 19. - 23. júlí og í 53. Alþjóðlegu Ólympíukeppninni í efnafræði sem verður haldin gegnum netið frá Japan, dagana 24. Júlí -1. ágúst 2021.

Kennsla eftir páska / Teaching after the Easter break

Við vonum að nemendur og starfsfólk hafi haft gott páskafrí. Skipulag skólastarfs eftir páska er sem hér segir: (see English below) • Fullt staðnám í öllum áföngum með einni undantekningu (lífsleikni útskriftarefna). • Kennsla í líkamsrækt verður úti. Nánari upplýsingar hjá kennurum. • Nemendur mega vera 30 saman í rými og ber að virða nándarreglur. • Grímuskylda er í MH. • Rými á Matgarði og Miðgarði eru afmörkuð miðað við leyfilegan fjölda. • Norðurkjallari getur rúmað allt að 60 nemendur, þ.e. 30 í hvoru rými (fremra og aftara rými). • Matsala nemenda, Sómalía, verður opin og selur vörur í lokuðum umbúðum. Virðum reglurnar og höfum einstaklingsbundnar sóttvarnir í fyrirrúmi, þ.e., handþvottur og sótthreinsun eru það allra mikilvægasta. Ef nemendur finna til einkenna tengdum COVID þá eiga þeir að vera heima og tilkynna veikindi á skrifstofu. Nánari upplýsingar um verkferla vegna smits og gruns um smit má finna á heimasíðu skólans.

Páskafrí

Páskafrí hefst eftir daginn í dag og stendur til og með 6. apríl. Skrifstofan verður lokuð og opnar ekki aftur fyrr en kl. 8:30 miðvikudaginn 7. apríl. Við hvetjum ykkur til að njóta páskanna eins og hægt er og safna orku fyrir síðustu vikurnar sem eftir eru af önninni. Við vonumst til að sjá ykkur öll hress eftir páska, gleðilega páska.