Fréttir

MH fékk skemmtilega heimsókn á föstudaginn þegar hluti úskriftarárgangsins 1982 kíkti í heimsókn í gamla skólann sinn. Þau gengu um skólann og rifjuðu upp ýmislegt skemmtilegt um veru sína í skólanum. Margt hefur breyst og var mjög gaman að heyra sögur þeirra frá verunni í MH. Eftir að hafa gengið um skólann, stillti hópurinn sér upp fyrir myndatöku á sviðinu á Matgarði þar sem Sómalía stóð einu sinni. Einn úr hópnum hafði frétt að það vantaði mynd af útskriftarárgangi haust 1982 upp á vegg og færði skólanum hana að gjöf. Takk fyrir okkur og takk fyrir komuna.

MH-ingurinn Mikael Norðquist bar sigur úr býtum í alþjóðlegri teiknikeppni sem var haldin í tilefni af vetrarólympíuleikunum í Kína. Það var Hongling Song kínverskukennari í MH sem hvatti nemendur til að taka þátt og úr varð að Mikael sendi inn mynd í keppnina. Mikael fékk verðlaunin afhent í Konfúsíusarstofnunni Norðurljós við hátíðlega athöfn. Við óskum verðlaunahafanum innilega til hamingju.

Prófum er lokið og einkunnir munu birtast í Innu eftir kl. 16:00 í dag, 18. maí. Á morgun er staðfestingardagur þar sem nemendur geta hitt umsjónarkennarana sína og farið yfir valið fyrir næstu önn. Umsjónarkennarar eru við milli klukkan 10 og 11 og má sjá staðsetningu þeirra hér á heimasíðunni. Námsráðgjafar, námstjórar, áfangastjóri og konrektor verða einnig við ykkur til aðstoðar. Einhverjir þurfa að gera breytingar miðað við gengi vorannar og hvetjum við ykkur öll til að skoða valið ykkar vel miðað við árangur vorannarinnar. Prófsýning er milli 11:15 og 12:15 í auglýstum stofum.

Sunnudaginn 15. maí kom kór skólans fram í Hörpuhorni í Hörpu á tónleikum en um var að ræða söngdagskrá fjögurra kóra. Kórfélagar tóku þessu tækifæri fagnandi enda lítið verið um tónleikahald á tímum COVID. Næst mun kórinn koma fram á brautskráningu skólans þann 28. maí næstkomandi.

Í keppninni Ungir frumkvöðlar fékk lið frá MH verðlaun fyrir ,,Besta hönnunin“ í JA - ungir frumkvöðlar, fyrirtækjasmiðju 2022. Liðið skipa þau Dagur Steinarsson, Gylfi Maron Halldórsson og Hrefna Tryggvadóttir. Verðlaunin voru veitt við hátíðlega athöfn í Arionbanka sl. föstudag. Nemendur höfðu bæði kynnt vöru fyrir dómara, tekið þátt í vörumessu og svo kynnt hugmyndina fyrir fullum sal og dómurum. Til hamingju öll.

Í dag, mánudaginn 2. maí, er fyrsta prófið og eru það eðlisfræði og franska sem eru fyrst á dagskránni. Um helgina sendi prófstjóri póst á alla nemendur um hvernig á að bera sig að í prófunum og minnum við nemendur á að þið getið mætt í inn í prófsalina 10 mínútur fyrir próf. Allar nánari upplýsingar eru í pósti prófstjóra. Gangi ykkur sem best og njótið þess að rifja upp efnið sem þið hafið verið að vinna með alla önnina.

Niðurstöður voru að berast úr árlegri þýskuþraut (þýskukeppni framhaldsskólanna) og að þessu sinni var MH-ingurinn Kolbrún Garðarsdóttir í einu af tíu efstu sætunum. Það er allaf gaman þegar okkar fólki gengur vel og óskum við Kolbrúnu innilega til hamingju með árangurinn.

Fleira var um að vera í hátíðarsal skólans í dag þar sem listir og menning fengu að njóta sín. Nemendur í japönsku í MH tóku þátt í ræðukeppni þar sem þau sögðu sögur, kynntu persónur, töluðu yfir myndbönd, kynntu lokaverkefni í efnafræði, spiluðu tónlist, sýndu sirkuslistir og ýmislegt meira sem þarf japönskuþekkingu til að segja frá.

Ljúfir tónar fylltu Miklagarð í dag þegar kór Menntaskólans við Hamrahlíð söng inn sumarið. Sungin voru fimm falleg lög undir stjórn Hreiðars Inga Þorsteinssonar. Í síðasta laginu blandaðist kórinn samnemendum sínum og tóku allir viðstaddir undir og sungu saman "Ó blessuð vertu sumarsól" við undirleik Jakobs Freys Einarssonar. Þetta var virkilega ljúf stund á sal í síðustu kennsluviku annar.