Fréttir

Á morgun, þriðjudaginn 18. apríl, verður fyrsta kynning fyrir 10. bekkinga sem misstu af opnu húsi 22. mars. Þar munu starfs- og námsráðgjafar, auk nemenda úr skólanum, taka á móti forvitnum 10. bekkingum og sýna þeim skólann og segja frá því sem við höfum upp á að bjóða. Fullt er á kynninguna í dag, en önnur kynning verður mánudaginn 24. apríl. Hér er hægt að skrá sig á kynninguna 24. apríl. Hægt er að skoða kynningarefni um MH hér á heimasíðunni og skemmtilegt myndband sem sýnir húsnæðið í MH séð í gegnum Minecraft gleraugu.

Söngkeppni framhaldsskólanna var 1. apríl þar sem tónlistarfólk úr framhaldsskólum landsins steig á stokk og sýndi ótrúlega sönghæfileika. Það er gaman að segja frá því að fyrir okkar hönd keppti Erla Hlín Guðmundsdóttir og landaði hún öðru sætinu í keppninni. Til hamingju með það. Við óskum einnig Fjölbrautarskólanum í Garðabæ til hamingju með sigurinn og Menntaskólanum í tónlist með þriðja sætið. Endilega skoðið upptöku af túlkun Erlu Hlínar á laginu Litli tónlistarmaðurinn.

Nýlega fóru fram úrslit í efnafræðikeppninni 2023 og átti MH tvo þátttakendur sem urðu í fjórum efstu sætunum. Jón Hilmir Haraldsson varð í öðru sæti og Jón Halldór Gunnarsson varð í fjórða sæti. Við óskum þeim innilega til hamingju með árangurinn en þess má geta að fjórum stigahæstu keppendunum er boðin þátttaka í íslenska landsliðinu og þeir sem þiggja sæti munu taka þátt í 55. Alþjóðlegu ólympíukeppninni (IChO) sem haldin verður í Zürich í Sviss 16.-25. júlí og í 6. Norrænu efnafræðikeppninni sem verður haldin í Danmörku dagana fyrir IChO.

Takk öll sem kíktuð við hjá okkur á opnu húsi í gær. Það var mjög gaman að sjá svona marga og við nutum þess að sýna ykkur hvað MH hefur upp á bjóða. Takk fyrir að koma. Til að kynna sér skólann enn frekar þá eru upplýsingar hér á heimasíðunni undir hnappnum Kynning á MH.

MH býður 10. bekkingum, foreldrum þeirra og aðstandendum, á opið hús miðvikudaginn 22. mars milli kl. 17:00 og 18:30. Kynningar á námsframboði skólans verða á Miklagarði, Miðgarði og í einstaka stofum. Kynningar á félagslífi skólans, ráðum og nefndum, verða á Matgarði og einnig munu nemendur skólans bjóða upp á leiðsögn um skólann. Bókasafnið verður opið og hægt að skoða aðstöðuna þar. Kórinn mun taka lagið og einnig verður boðið upp á kleinur í tilefni dagsins.

Frönskukeppnin er haldin árlega af Félagi frönskukennara, Alliance Francaise og franska sendiráðinu fyrir nemendur í framhaldsskólum. Að þessu sinni unnu nemendur MH til fyrstu og þriðju verðlauna. Heiða Rachel Wilkins hlaut 1. verðlaun og Ollie Sánchez-Brunete og Kristjana Ellen Úlfarsdóttir hlutu 3. verðlaun og óskum við þeim innilega til hamingju með árangurinn. Nemendurnir gerðu myndband um hvað Frakkland, franska og frönsk áhrif í heiminum táknuðu fyrir þau. Myndböndin þóttu mjög lifandi og skemmtileg og nemendur sýndu vel hvað þau eru hugmyndarík og góð í frönsku.

Umsóknartímabil fyrir nemendur sem eru að koma beint úr grunnskóla hefst mánudaginn 20. mars og stendur til og með 8. júní. Nemendur sækja um á vef Menntamálastofnunar. Í MH er hægt að sækja um á félagsfræðabraut, náttúrufræðibraut, málabraut, opinni braut, listdansbraut, IB braut og nýrri braut sem heitir listmenntabraut. Nánar má lesa um allar brautirnar hér á heimasíðunni og einnig verður góður aðgangur að kennurum, náms- og starfsráðgjöfum, nemendum og stjórnendum á opnu húsi sem verður miðvikudaginn 22. mars milli kl. 17:00 og 18:30. Einnig er tækifæri til að hitta fulltrúa okkar í Laugardalshöll á Mín framtíð sem stendur yfir þessa dagana. 

Próftafla vorannar 2023 hefur verið birt nemendum í Innu og á heimasíðunni. Prófstjóri hefur einnig sent öllum nemendum póst varðandi prófin.

Föstudaginn 17. mars frumsýnir Leikfélag NFMH glænýja íslenska söngleikinn „Þú ert hér“ í Undirheimum í MH. Verkið er frumsamið af leikhóp skólans og var unnið í samsköpun og út frá spuna. Björg Steinunn Gunnarsdóttir og Inga Steinunn Henningsdóttir, sviðshöfundar, listakonur og MH-ingar leikstýra. Í sýningunni fá hæfileikaríkir nemendur að njóta sín á sviði, hvort sem það er að leika, dansa, syngja eða spila tónlist. Leikhópurinn fær lánaða nokkra meðlimi úr Húsbandinu til að flytja tónlistina með leikurunum á sviðinu. Stefnt á að hafa 10 sýningar. Miðasala er á Tix.is.  Við hvetjum nemendur og starfsfólk til að fara á þessa glæsilegu sýningu.

Þann 11. mars keppti lið frá MH í forritunarkeppni framhaldsskólanna sem Háskólinn í Reykjavík hélt. Lið MH keppti í svokallaðri Beta-deild og lenti í öðru sæti en liðið skipuðu Karl Ýmir Jóhannesson, Ómar Bessi Ómarsson og Tristan Orri Elefsen og kennari liðsins er Björgvin Friðriksson. Við óskum liðinu innilega til hamingju með árangurinn.