Fréttir

Föstudaginn 18. febrúar mun Menntaskólinn við Hamrahlíð flytja Microsoft skýjageira sinn yfir í Menntaskýið. Menntaskýið er verkefni á vegum íslenska ríkisins þar sem Microsoft hugbúnaður er sameinaður í eina miðlæga einingu. Innleiðing á þessu verkefni hefst kl. 12:00 föstudaginn 18. febrúar og verður lokið mánudaginn 21. febrúar. Klukkan 12:00, föstudaginn 18. febrúar, verður lokað á innskráningar á MH aðganga, þ.e. Office365 aðganginn. Þegar nemendur og starfsfólk skráir sig inn í fyrsta skipti, eftir flutninginn, þarf að fylgja leiðbeiningum sem settar verða á MH síðuna. Það skiptir miklu máli að allir skoði strax hvort þeir eigi einhver skjöl í FORMS eða SWAY sem þarf að afrita fyrir flutninga. Allar leiðbeiningar má finna hér og munum við gera okkar besta til að halda öllum upplýstum. Nánari upplýsingar koma síðar og allir þurfa að fylgjast vel með.

Vegna versnandi veðurspár og mikillar ofankomu höfum við ákveðið að fella niður kennslu eftir hádegi í dag 14. febrúar. Póstur um þetta hefur verið sendur til allra og vonum við að allir komist heim og við sjáumst í fyrramálið. ___ In light of bad weather forecast this afternoon 14th of February, we will cancel all classes from 12:55. I hope everyone gets home safe and we will see you all tomorrow at school.

Reglur varðandi grímuskyldu í skólum hafa verið rýmkaðar og núna er leyfilegt að taka grímur af inni í kennslustofum. Þar sem reglur um sóttkví og einangrun hafa líka verið rýmkaðar þá er enn nauðsynlegra að allir passi vel upp á persónulegar sóttvarnir. Munum að spritta okkur og nota grímu þar sem það á við.

Í ljósi rauðrar veðurviðvörunar Veðurstofunnar og Almannavarna hefur verið ákveðið að staðkennsla hefjist ekki fyrr en eftir hádegi á morgun, 7. febrúar, þ.e. kl. 12:50. Nemendur hafa fengið tölvupóst með nánari upplýsingum. Við munum setja inn fréttir á heimasíðuna ef eitthvað breytist.

Lagningardagar nálgast, en það eru dagar þar sem hefðbundin kennsla liggur niðri og ýmislegt annað er gert sér til dundurs. Lagningardagar verða 24. og 25. febrúar. Þeir nemendur sem vilja vera með viðburð á Lagningardögum geta sótt um það á þar til gerðri umsóknarsíðu sem lagningardagaráð NFMH sér um. Nánar má lesa um Lagningardaga hér á heimasíðunni.

Reglur varðandi sóttkví og smitgát breytast mjög ört þessa dagana og nú var verið að uppfæra þær enn einu sinni. Við hvetjum alla til að kynna sér breyttar reglur um sóttkví og smitgát sem hafa verið settar á heimasíðuna.

Þegar eintaklingar sem stunda nám í MH greinast með Covid-19 eftir PCR próf, fer smitrakning í gang. Þeir einstaklingar sem þurfa að fara í sóttkví eru látnir vita eins fljótt og auðið er. Aðrir sem voru með viðkomandi í kennslustund fá ekki tölvupóst eða upplýsingar um smitið þar sem ekki er lengur verið að senda einstaklinga í smitgát. Sóttkví ræðst af því hversu nálægt viðkomandi einstaklingi einhver var, hversu lengi og hvort grímur voru notaðar. Í þeim aðstæðum sem má taka niður grímur, þurfa allir að hugsa um að auka fjarlægðina við næsta mann og ekki vera of lengi grímulaus. Við hvetjum því alla til að nota grímur, halda fjarlægð og fara eins varlega og þeim er unnt í þeirra persónulegu sóttvörnum.

Lið MH er komið í þriðju umferð Gettu betur en í annarri umferð sigraði MH lið ME með 34 stigum gegn 9 stigum andstæðinganna. Lið MH skipa Una Ragnarsdóttir, Ísleifur Arnórsson og Júlía Helga Kristbjarnardóttir. Í næstu umferð mætir lið MH liði Kvennaskólans og fer viðureignin fram 25. febrúar og verður á RÚV. Við óskum liði MH til hamingju með glæsilegan árangur og munum fylgjast spennt með næstu umferð.

Þessa dagana er fjöldi nemenda í sóttkví eða með Covid og því skiptir miklu máli að þeir sem ekki geta sótt skólann viti hvað er í gangi í skólanum. Stoðþjónustan sendi út póst í gær þar sem ítrekað var mikilvægi þess að fylgjast vel með á Innu. Í Innu má líka finna ýmsar leiðbeiningar varðandi notkun hennar og er þær að finna undir flipanum Aðstoð.

Það er mikið líf og fjör í skólanum í dag enda fyrsti kennsludagur vorannar 2022 hafinn. Það er gaman að sjá glöð grímuklædd andlit nemenda að springa af spenningi að mæta í fyrsta tímann og hitta kennara og samnemendur. Við vonum að þetta gangi vel og að skóladagarnir verði margir og góðir. Við uppfærum heimasíðuna reglulega og setjum inn allar nýjustu upplýsingar svo allir viti sem best hvað er að gerast í MH. Hér á forsíðunni er hnappur sem heitir Kennsla í Covid-19 og geymir hann ýmsar gagnlegar upplýsingar varðandi sóttvarnir og Covid-19. Undir Skólinn, Nemendur og forráðamenn er hlekkur sem geymir alla pósta sem frá okkur fara til allra nemenda eins og sá sem fór út í morgun. Þar má t.d. finna upptöku af ávarpi rektors síðan í morgun. Gleðilega önn.