Fréttir

Ef nemendur eru veikir á prófdegi þá þarf að tilkynna það í gegnum Innu fyrir kl. 14 á sama degi og prófið er. Nánari upplýsingar má finna á heimasíðunni Námið, próf, sjúkrapróf.

Prófin eru hafin í MH og því nóg að gera við prófundirbúning bæði hjá starfsfólki og nemendum. Á meðan á prófatímabili stendur er lokað á einkunnir í Innu sem þýðir að nemendur sjá ekki lokaeinkunnir í áföngum. Ef einhverjar einkunnir sjást þá eru þær ekki endanlegar fyrr en tilkynnt hefur verið um það, eftir kl. 16:00, 19. maí og þær keyrðar inn í feril. Gangi ykkur sem best í prófunum.

Í dag eru útskriftarefni vorannar að kveðja skólann og gera sér glaðan dag áður en prófatörnin hefst. Af því tilefni buðu þau starfsfólki í morgunmat og svo verður skemmtun á sal. Útskriftarefnin mæta flest í búningum í dag og fékk rektor einn fríðan hóp í heimsókn á kontorinn. Seinna í dag verður farið í ratleik og endar dagurinn á skemmtistað úti í bæ. Góða skemmtun í dag og takk fyrir samveruna í MH.

Í MH er kenndur leiklistaráfangi sem snýst um leikhús í London, með áherslu á Shakespeareleikhúsið. Í gærkvöldi fengu gestir og gangandi að upplifa Shakespeare okkar MH-inga í Norðurkjallara og leggja um leið sitt að mörkum til að styrkja nemendur til fararinnar til London. Upplifunin var sett fram á marga vegu og má geta sér þess til að Shakespeare sjálfur hefði ekki haft eins mikið hugmyndaflug í framsetningu eins og nemendurnir höfðu. Margar persónur úr verkum hans mættu á svæðið ásamt dætrum hans og honum sjálfum sem ungum MH-ingi. Í haust fer af stað ný braut í MH, Listmenntabraut og ef Villi Shjeik væri að koma úr 10. bekk þá myndi hann væntanlega velja þá braut. Góða ferð öll.

Áður en prófin hefjast hvetjum við ykkur til að fara vel yfir próftöfluna og skoða hvaða daga prófin ykkar eru og klukkan hvað þau byrja. Ef einhver á eftir að fá lausn á einhverju sem tengist próftöflunni þá er hægt að hafa samband við prófstjóra og/eða náms- og starfsráðgjafa. Á prófdaginn er gott að fá sér uppáhaldsmorgunmatinn og reyna að láta sér líða vel á meðan borðað er. Fleiri góð ráð eins og þessi má finna hér á heimasíðunni undir leiðbeiningar varðandi próf. 

Sunnudaginn 30. apríl verður stóri plokkdagurinn þar sem landsmenn gera sitt besta til að hreinsa til og plokka í sínu nánasta umhverfi. Við í MH tókum forskot á sæluna og plokkuðum í kringum MH í dag. Okkur finnst gaman að hafa umhverfið okkar hreint og fallegt.

Nokkrir nemendur frá MH tóku þátt í þýskuþraut og stuttmyndakeppni á vegum þýska sendiráðsins, þýskukennarafélagsins og Goethe Institut í Kaupmannahöfn. MH-ingarnir stóðu sig mjög vel og fengu nokkur verðlaun. Guðmundur Brynjar Þórarinsson varð í öðru sæti á getustigi 1 þar sem 130 keppendur tóku þátt og Einar Ernir Kjartansson varð í 4. sæti á getustigi 2 þar sem 30 keppendur tóku þátt. Einnig voru veitt verðlaun í stuttmyndakeppni þar sem þau Auður Líf Stangeland og Anja Huld Jóhannsdóttir fengu fyrstu verðlaun og Einar Ernir Kjartansson og Lilja Sól Helgadóttir önnur verðlaun. Til hamingju öll með þennan glæsilega árangur - sehr gut.

Gleðilegt sumar og takk fyrir veturinn. Hvernig væri að skella sér í jógatíma í dag kl. 13:00 í íþróttahúsi MH í boði Indverska sendiráðsins? Þið eruð öll velkomin! Það þarf að skrá sig með því að skanna QR kóðann á myndinni.

Í gær 18. apríl tóku nokkrir nemendur á fjölnámsbraut MH þátt í hæfileikakeppni starfsbrauta framhaldsskólanna. Keppnin var haldin í Tækniskólanum og tóku 14 skólar þátt. Meðal dómara var Haffi Haff og tók hann einnig tvö söngatriði. Úrslitin urðu svo þau að MH sigraði - til hamingju MH. Snævar Örn Kristmannson lék á gítar og á meðan gekk glærusýning með myndlistaverkum eftir nokkra nemendur á brautinni. Miklir hæfileikar voru þarna á ferð og listamenn framtíðarinnar að stíga sín fyrstu skref.

Á morgun, þriðjudaginn 18. apríl, verður fyrsta kynning fyrir 10. bekkinga sem misstu af opnu húsi 22. mars. Þar munu starfs- og námsráðgjafar, auk nemenda úr skólanum, taka á móti forvitnum 10. bekkingum og sýna þeim skólann og segja frá því sem við höfum upp á að bjóða. Fullt er á kynninguna í dag, en önnur kynning verður mánudaginn 24. apríl. Hér er hægt að skrá sig á kynninguna 24. apríl. Hægt er að skoða kynningarefni um MH hér á heimasíðunni og skemmtilegt myndband sem sýnir húsnæðið í MH séð í gegnum Minecraft gleraugu.