Fréttir

Afmælisnefnd í samvinnu við Beneventumsjóð hefur ákveðið að efna til samkeppni um tónverk fyrir Kór Menntaskólans við Hamrahlíð, samið við ljóð eftir núverandi eða fyrrum nemendur skólans. Þátttakendur velja úr fimm ljóðum en höfundar þeirra eru: Gerður Kristný, Guðrún Lilja Ólafsdóttir, Hallgrímur Helgason, Lofn og Sóley Mjöll Ásgeirsdóttir. Ljóðin og nánari upplýsingar um keppnina má finna hér. Skilafrestur tónverka er til 14. ágúst.

Miðvikudaginn 22. apríl, kl.18:00-18:45 fagnar Kór Menntaskólans við Hamrahlíð vel heppnuðu tónleikaferðalagi um Norðurland, með heimkomutónleikum í hátíðarsal skólans. Ókeypis aðgangur verður á tónleikana! Í kjölfar þeirra verður hægt að styrkja kórsjóð með frjálsum framlögum. Kórmeðlimir sjá um kynningar, einsöng og hljóðfæraleik. Verið velkomin, sjáumst vonandi sem flest!

Síðastliðinn föstudag héldu allir IB-nemendur á fyrra ári til Þingvalla, þar sem þau fengu fræðslu um sögu og náttúru staðarins og unnu að þverfaglegu rannsóknarverkefni í litlum hópum. Hóparnir skoðuðu m.a. áhrif ferðamennsku á vatn og gróður svæðisins, sem og gæði ferðamannaaðstöðu á svæðinu. Niðurstöður verkefnanna voru svo kynntar á veggspjaldakynningu á Miðgarði nú í eftirmiðdaginn.

Nemendur í japönsku í MH fengu góðan gest í heimsókn þegar þau fengu til sín gestafyrirlesara frá Tokyo University Research Institute, Yuki Tokunaga en hann er fræðimaður við stofnun iðnaðarvísinda við háskólann í Tokyo. Erindi hans kallaðist: "What is culture? Why culture matters? - Japanese Culture Through the Lens of Traditional Crafts". Frekari upplýsingar er hægt að nálgast hér: https://hi.is/vidburdir/lifandi_hefdir_hvad_getum_vid_laert_af_aldagomlum_japonskum_fjolskyldufyrirtaekjum?fbclid=IwY2xjawRNgaVleHRuA2FlbQIxMQBicmlkETFTU2Zmb0NVRGMzb2JWdzE2c3J0YwZhcHBfaWQQMjIyMDM5MTc4ODIwMDg5MgABHkB711jl9iFpT-fMgvChlpZkG5qK1qX9vmFjySOXzaQmzK7pgW20nG1mx_qX_aem_Jk4TsPSWh7HWMhe1xszVcA.

Í tilefni þess að Menntaskólinn við Hamrahlíð verður 60 ára næsta haust hefur afmælisins minnst með ýmsum hætti og umfangsmikil afmælisdagskrá verður laugardaginn 26. september. Takið þann dag endilega frá. Nemenda- og hollvinasamtökin NHMH og Beneventumsjóður freista þess að styðja skólann á afmælisárinu. Það gerist bæði með þátttöku í undirbúningi afmælisins og fjárhagslegum stuðningi í gegnum Beneventumsjóðinn. Meðal annarra verkefna er stuðningur við innra starf skólans sem og skipulag og fegrun lóðar og umhverfis skólans þar sem komið verður fyrir listaverkum í eigu hans.

Kór Menntaskólans við Hamrahlíð leggur upp í langferð föstudaginn 17. apríl kl. 8:30. Ferðinni er heitið norður í land. Aðgangur að tónleikunum er ókeypis. 

Laugardaginn 11. apríl nk. verða úrslit Söngkeppni framhaldsskólanna sýnd í beinni útsendingu á RÚV. Útsendingin hefst klukkan 20:45 og verður fulltrúi MH Sigrún Ásta Magnúsdóttir. Sigrún Ásta er með númerið 900-9119 og hvetjum við öll til að kjósa með hjartanu. Við óskum Sigrúnu Ástu góðs gengis á laugardaginn.

Ellý okkar sem hefur starfað í matsölu nemenda í yfir 20 ár er að kveðja og þess vegna auglýsir NFMH eftir rekstrarstjóra í Sómalíu. Auglýsinguna má finna á starfatorgi. Vonandi er önnur "Ellý" þarna úti handa okkur. Þetta er ótrúlega skemmtilegt starf.

Í dag var síðasti kennsludagur fyrir páska og nemendur og starfsfólk er farið í páskafrí. Við mætum öll hress og kát aftur miðvikudaginn 8. apríl. Gleðilega páska

MH er sigurvegari framhaldsskólakeppninnar um Mannréttindaskóla ársins 2025 og safnaði flestum undirskriftum fyrir mannréttindaátakið "Þitt nafn bjargar lífi". Af því tilefni bauð Íslandsdeild Amnesty International nemendum skólans upp á bollakökur og afhentu nemendafélagi skólans farandbikar og viðurkenningarskjal. Hjartanlega til hamingju nemendur og NFMH.