Fréttir

Skrifstofa skólans verður lokuð frá og með föstudeginum 30. maí til og með þriðjudeginum 3. júní. Skrifstofan opnar aftur miðvikudaginn 4. júní og verður opið frá 8:30 - 15:30. Skrifstofan lokar svo aftur 5. og 6. júní.

Brautskráðir voru 130 nemendur frá Menntaskólanum við Hamrahlíð af 8 námsbrautum. Flestir útskrifuðust af opinni braut eða 63 nemendur, 21 af náttúrufræðibraut, 8 af félagsfræðabraut, 2 af málabraut, 3 af listdansbraut, 28 nemendur af IB-braut og 3 af fjölnámsbraut. Alls voru 8 nemendur brautskráðir með ágætiseinkunn á stúdentsprófi, þ.e. vegin meðaleinkunn yfir 9,00. Að þessu sinni var dúx skólans Yi Ou Li, stúdent af náttúrufræðibraut, með 9,72 í meðaleinkunn. Yi Ou Li hlaut einnig viðurkenningu fyrir ágætan námsárangur í líffræði. Semidúx var Anna Valgerður Káradóttir sem útskrifaðist af náttúrufræðibraut með 9,68 í meðaleinkunn. Anna Valgerður hlaut einnig viðurkenningu fyrir ágætan námsárangur í líffræði og spænsku. Fyrir hönd nýstúdenta tóku til máls Daði Víðisson og Fjóla Gerður Gunnarsdóttir og fyrir hönd 50 ára stúdenta flutti Dögg Pálsdóttir ávarp.  Nýstúdentinn Baldur Kári Malsch Atlason flutti verkið Clair de lune á píanó og nýstúdentar úr kórnum sungu verkið Gömul vísa um vorið eftir Gunntein Ólafsson, ljóðið eftir Stein Steinarr. Athöfninni var svo slitið með samsöng undir forystu kórstjórans Gísla Magna sem stjórnaði kórnum að þessu sinni, í fjarveru Hreiðar Inga Þorsteinssonar.

Í dag er hátíðisdagur í MH og munu 130 nemendur útskrifast kl. 13:00. Útskriftarefni eru hvött til að mæta tímanlega til að raða sér upp og setja upp sparibrosið og næluna. Eftir athöfnina verður útskriftarmyndin tekin og hún mun birtast hér á heimasíðunni við strax og hægt er. Allar útskriftarmyndir sem við eigum eru sýnilegar hér á heimasíðunni. Til hamingju með daginn og njótum hans saman.

19 MH-ingar í ferðaáfanga í spænsku, heimsóttu hina fögru Granada á Spáni í síðustu viku. Þar skoðuðu þau meðal annars hina undurfögru Alhambra höll, sögufræg hverfi, torg og turna. Þau fóru í fjallaferð og böðuðu sig í ískaldri á og fóru í gönguferðir í náttúrunni. Lokadeginum var varið á strönd og heitum strætum Málaga. Þau voru öll sem eitt skóla og þjóð til sóma, fróðleiksfús og miklir göngugarpar og þakkar hópurinn fjallgönguáfanganum í MH fyrir góðan undirbúning í þeim efnum. Takk fyrir ferðina Andalucía 2025!

Fimmtudaginn 22. maí er staðfestingardagur og sýnidagur prófa. Allar upplýsingar um áfangaframboð haustannar má finna á heimasíðu skólans undir "Námið".

Nú er prófum lokið hjá langflestum MH-ingum og kennarar sitja sveittir við að ganga frá einkunnum. Opnað verður fyrir einkunnir í Innu fimmtudaginn 22. maí.

Nýir MH-ingar hafa litið dagsins ljós í Útgarði og njóta þess að fá að búa þar. Á meðan þreyta eldri MH-ingar próf og njóta þess að hlusta á róandi fuglasönginn. Síðasta próf verður á föstudaginn og þá geta eldri og yngri MH-ingar flogið saman út í sumarið. Umsóknartímabilið stendur einmitt yfir fyrir nýnema haustannar og hvetjum við þau sem vilja kynna sér MH að skoða hvað skólinn hefur upp á að bjóða.

Í þessum heilsumola ræðir Erla íþróttakennari og þáttastjórnandi við Sólrúnu Ósk Lárusdóttur, sálfræðing í MH um prófkvíða, af hverju hann stafar og hvað er hægt að gera til þess að minnka áhrif hans á okkur.

Í dag er fyrsta próf skv. próftöflu og standa prófin yfir til og með 16. maí. Próftafla nemenda er sýnileg í Innu og próftaflan í heild sinni er á heimasíðunni. Staðsetningu prófa má finna á heimasíðunni. Veikindi á prófdegi þarf að tilkynna samdægurs í Innu, fyrir kl. 14. Gangi ykkur sem best og passið upp á næringu og hvíld.

Föstudaginn 24. apríl hélt Kór MH af stað í tónleikaferð um Norðvesturland. Kórinn byrjaði á að syngja fyrir yngstu nemendur Helgafellsskóla í Mosfellsbæ og svo lá leiðin til Húnabyggðar. Daginn eftir var haldið til Skagastandar í blíðskaparveðri, þar sem nemendur heimsóttu Spákonuhof og héldu tónleika í Hólaneskirkju. Eftir það lá leiðin til Blönduóss þar sem kórinn hélt tónleika í Blönduóskirkju. Gist var tvær nætur á Reykjum í Hrútafirði. Ferðin endaði svo með viðkomu í Reykholtskirkju í Borgarfirði þar sem haldnir voru lokatónleikar annarinnar. Mjög vel heppnuð ferð í alla staði.