Menntaskólinn við Hamrahlíð

Nemendur í áfanganum íslenskar draugasögur, ÍSLE2BÚ05, fóru í heimsókn á elliheimilið Grund á dögunum, ásamt kennara sínum Elvu Brá. Þau lásu frumsamdar og einnig gamlar draugasögur fyrir heimilisfólkið. Einnig sögðu þau frá atburðum úr samtímanum sem komu frá þeim sjálfum eða voru sögusagnir. Heimsóknin vakti mikla lukku heimilisfólksins og fengu nemendur safa og nammi í verðlaun.

Nemendur í MH boðuðu til samstöðufundar til að sýna þolendum kynferðisofbeldis stuðning og að þau væru ekki ein. Fundurinn hófst kl. 11 með því að nemendur gengu út úr tímum og söfnuðust saman á lóð skólans. Þar höfðu nemendur skipulagt ræðuhöld og ljóðalestur og einnig var farið með brot úr einleiknum "Orð gegn orði". Mikill samhugur var í loftinu og tókst fundurinn mjög vel og sýndu nemendur að þau hafa sterka rödd sem þau vilja að heyrist. Skólanum var afhentur kröfulisti þar sem meðal annars var óskað eftir skýrara verklagi, meira öryggi, gagnsæi og fræðslu.

Nemendur í enskuáföngunum ENSK2BB05 og ENSK2AB10 eru þessa dagana að lesa bók sem heitir Q&A eftir indverska höfundinn Vikas Swarup. Sagan gerist á Indlandi og veitir nemendum áhugaverða innsýn í menningu sem er töluvert frábrugðin þeirri sem við þekkjum hér á Íslandi. Til að undirbúa nemendur fyrir lesturinn, fengum við góða heimsókn frá indverska sendiráðinu síðastliðinn föstudag, 2. október. Markmiðið með heimsókninni var að gefa nemendum tækifæri til að spyrja ígrundaðra spurninga um bókina, indverska menningu og annað sem hefur vakið forvitni þeirra við lesturinn. Það vildi svo skemmtilega til að heimsóknin var einmitt á afmælisdegi Gandhi svo nemendur fengu einnig fyrirlestur um ævi og störf þess merka manns. Við þökkum sendiherra Indlands á Íslandi, Hr. Shri R. Ravindra, og samstarfsfólki hans, Anisha Tomar og Akash Chahar, kærlega fyrir komuna og fyrir einstaklega fræðandi fyrirlestra og samtal.

Úrslit í tónverkakeppni Menntaskólans við Hamrahlíð og Beneventumsjóðs liggja fyrir og voru tilkynnt á afmælishátíð skólans laugardaginn 26. september. Sigurvegari keppninnar er Björn Önundur Arnarson fyrir tónverkið Gunnhildur við samnefnt ljóð MH-ingsins Hallgríms Helgasonar. Við óskum Birni Önundi innilega til hamingju og erum spennt að hlýða á kór Menntaskólans við Hamrahlíð frumflytja verkið í nóvember.

Takk, kæru MH-ingar og aðrir gestir, fyrir komuna í 60 ára afmæli MH á laugardaginn. Það eru forréttindi að fá að taka á móti ykkur öllum og við getum ekki hætt að brosa. Dagskráin sem MH-ingar fyrr og ný buðu okkur upp á var í alla staði frábær og mjög vel sótt. Húsfyllir var af glöðum MH-ingum sem þyrsti í að hitta aðra MH-inga og var mikið um fagnaðarfundi. Takk öll sem komuð fram og gáfuð okkur stórkostlega upplifun á öllum sviðum listarinnar allan daginn. Takk kærlega fyrir frábæran dag.

Hér má nálgast streymi á frábæra afmælisdagskrá í tilefni 60 ára afmælis MH.

Í dag, 24. september, eru 60 ár liðin frá því Menntaskólinn við Hamrahlíð var settur í fyrsta skipti af Guðmundi Arnlaugssyni, þáverandi rektor. Af því tilefni verður blásið til afmælisveislu á laugardaginn hér í MH. Húsið verður opnað kl. 10:00 og stendur dagskráin fram eftir kvöldi. Dagskrána í heild sinni má finna hér á heimasíðunni og á samfélagsmiðlum tengdum MH. Við erum mjög spennt að taka á móti öllum.