Kennslufræðileg stefna

Leiðarljós skólans er hin kennslufræðilega stefna í hnotskurn.

Áfangakerfið gegnir veigamiklu hlutverki í útfærslunni, bæði hvað varðar ábyrgð nemenda og fjölbreytni námsins. Nemendur skipuleggja sjálfir áfangaval sitt að því marki sem framboð og undanfarareglur leyfa, þeir geta haft áhrif á framboð valáfanga og komið með hugmyndir að nýjum áföngum. Þá gefst nemendum og kostur á að ljúka áfanga án þess að sitja kennslustundir og að vinna sjálfstæð verkefni sem telja til eininga (sjá kaflann um óhefðbundið nám).

Framboð valáfanga miðast við tvíþætt hlutverk; annars vegar að gefa kost á breidd í námi og hins vegar dýpkun á afmörkuðu sviði t.d. með tilliti til áætlaðs háskólanáms.

Leitast er við að hafa fjölbreytni í kennsluaðferðum og að virkja nemendur bæði í skóla og heima fyrir. Sveigjanleiki í lengd kennslustunda og fjölbreytni í kennsluaðferðum setja nám nemandans í brennidepil fremur en kennslu kennarans og endurspeglar ábyrgð nemenda.

Tölvunotkun og upplýsingatækni koma við sögu í flestum námsgreinum og leggur skólinn áherslu á greiðan aðgang nemenda að tölvum í skólanum. Heimildaöflun, ritgerðir, verkefnavinna, tilraunir og notkun kennsluforrita eru órofa hluti námsins.

Í nær öllum áföngum byggist námsmat bæði á vinnu nemandans yfir önnina og lokaverkefni eða lokaprófi í annarlok.

Kennarar eru hvattir til þess að vera sívirkir í þróunarstarfi og stefna skólans er að hlúa að nýbreytnistarfi á vegum einstakra kennara og kennarahópa bæði með fjárhagslegum og faglegum stuðningi.

Síðast uppfært 4. nóvember 2016

Síðast uppfært: 04. nóvember 2016