Menntaskólinn við Hamrahlíð

Nýnemadagur mánudaginn 17. ágúst

Thu, 13 Aug 2026 16:31:00 +0000

Nýnemakynningin fer fram mánudaginn 17. ágúst kl. 13:00–15:00. Þar fá nemendur tækifæri til að kynnast skólanum, hitta umsjónarkennarann sinn og fá mikilvægar upplýsingar um fyrstu dagana í MH

Búið að opna fyrir stundatöflur nemenda

Thu, 13 Aug 2026 13:35:00 +0000

Búið að opna fyrir stundatöflur nemenda. Öll sem hafa greitt skólagjöld sjá stundatöflur og bókalista áfanga. Einnig hefur verið opnað fyrir umsóknir eldri nemenda um töflubreytingar í Innu, en opið verður fyrir þær umsóknir til og með sunnudeginum 16. ágúst.

Stundatöflum seinkar

Wed, 12 Aug 2026 14:37:00 +0000

Vinna við stundatöflugerð hefur tafist og þurfum við meiri tíma til að klára töflurnar. Stefnt er að því að birta þær fyrir föstudaginn.

Inna lokuð fram í næstu viku

Thu, 06 Aug 2026 13:53:00 +0000

Nú er skólinn að vinna í stundatöflum nemenda og því hefur Innu verið lokað um stundarsakir. Stefnt er að því að opna hana aftur eftir kl. 16 miðvikudaginn 12. ágúst. Þá munu þau sem hafa greitt skólagjöld sjá stundatöflur og bókalista áfanga.

Bronsverðlaun í efnafræði

Mon, 20 Jul 2026 10:09:00 +0000

Fannar Smári Jóhannsson, stúdent frá Menntaskólanum við Hamrahlíð í vor, hlaut bronsverðlaun á Ólympíuleikunum í efnafræði sem haldnir voru í Tashkent, höfuðborg Úsbekistan, í vikunni. Fannar Smári vann sér inn keppnisrétt með því að verða í öðru sæti í úrslitakeppninni í Efnafræði sem haldin var í vor. Þar var hann jafnframt efstur í verklega hluta keppninnar. Fréttin er fengin af mbl.is Skv. heimildum hafa Íslendingar fengið bronsið nokkrum sinnum t.d. 2023, 2018, 2015, 2011, 2010 og 2008 https://icho-official.org/results/country_info.php?country=Iceland

Frönskuverðlaun

Fri, 26 Jun 2026 11:06:00 +0000

Móttaka var haldin í boði Alliance française og franska sendiráðsins sl. miðvikudag þar sem verðlaunahöfum í frönsku voru veittar viðurkenningar. Karólína Thoroddsen nýstúdent, var verðlaunahafi MH og óskum við henni innilega til hamingju. Félicitations!

Umsóknir og biðlisti

Mon, 22 Jun 2026 14:21:00 +0000

Alls sóttu rétt tæplega 800 nýútskrifaðir 10. bekkingar um skólavist í MH fyrir næsta haust, þar af 342 með MH í fyrsta vali. Af þessum fjölda gátum við tekið inn 280 nýnema en svigrúm til að taka við fleirum er því miður nánast ekkert. Við viljum þó hvetja alla umsækjendur sem eru á leið í aðra skóla næsta haust, að nálgast það verkefni með jákvæðni og bjartsýni að leiðarljósi. Það leynast mörg frábær tækifæri víðar en í MH.

Nýr konrektor MH

Fri, 19 Jun 2026 15:39:00 +0000

Guðmundur Arnlaugsson hefur verið ráðinn konrektor MH. Hann hefur gegnt starfinu síðan i febrúar 2025 í afleysingu en áður var hann IB-stallari. Við erum mjög ánægð með að fá að njóta krafta hans áfram á næstu árum.

Innritun nýnema

Fri, 19 Jun 2026 14:18:00 +0000

Í dag fengu grunnskólanemendur að vita í hvaða framhaldssskóla þeir munu hefja nám haustið 2026. Tæplega 800 nemendur sóttu um MH í fyrsta, öðru eða þriðja vali og því augljóst að ekki er hægt að verða við óskum allra. Þau sem ekki komust inn, en uppfylla inntökuskilyrðin, geta sótt um í nóvember ef þau vilja enn koma í MH. Reyndin er samt sú að allir skólar taka vel á móti nemendum sínum og þess verður ekki langt að bíða að sá skóli, sem nemendur innritast í, verður besti skólinn. Við innrituðum rúmlega 300 nýja MH-inga og næstu daga verður valið á þá í samræmi við braut og upplýsingar sem komu fram í umsókninni. Bréf mun fara út á alla nýja nemendur mánudaginn 22. júní með öllum upplýsingum um skólagjöld og skólabyrjun í haust. Velkomin í MH.

Vegvísir

Thu, 04 Jun 2026 18:12:00 +0000

Úskriftarárgangur 1982 gaf skólanum listaverkið Vegvísi á 10 ára útskriftarafmæli sínu árið 1992. Listaverkið er tileinkað þáverandi húsverði skólans, Jóhanni Hjálmarssyni, og er verkið eftir Þóri Barðdal. Listaverkinu var upprunalega fundinn staður á meðal lágvaxinna planta á vesturlóð skólans. Síðan eru liðin mörg ár og verkið hefur smá saman týnst inn í skóginn sem þar vex. Í tilefni af 60 ára afmæli skólans í haust, ákvað fyrrnefndur árgangur að láta hreinsa listaverkið og finna því betri stað.

Sumartiltekt í MH

Tue, 02 Jun 2026 11:49:00 +0000

Þá líður senn að lokum vorannar 2026 í MH og starfsfólk að ljúka tiltekt eftir veturinn. Tiltektin hefur leitt ýmislegt skemmtilegt í ljós og ýmis djásn frá nemendum fundist. Þessi metnaðarfullu verkefni eru dæmi um hugmyndaauðgi nemenda skólans í söguáföngum á liðnum árum.

Til hamingju með daginn

Fri, 29 May 2026 15:37:00 +0000

Í dag voru brautskráðir 127 nemendur frá Menntaskólanum við Hamrahlíð af 8 námsbrautum. Dúx skólans var Sóley Júka Magnúsd. Kuwahara , stúdent af náttúrufræðibraut með 9,88 í meðaleinkunn. Semidúx var Lilja Rut Halldórsdóttir stúdent af Náttúrufræðibraut með 9,83 í meðaleinkunn. Gaman að segja frá því að kór skólans, undir stjórn Hreiðars Inga Þorsteinssonar, frumflutti verk eftir föður hennar í tilefni dagsins. Mikið var um annan tónlistarflutning sem nýstúdentar sáu um ásamt kór skólans. Fyrir hönd nýstúdenta fluttu Dýrleif Kristín Flókadóttir og Illugi Vilhelmsson ræðu, Chadman Ian Naimi lék á píanó, Svanhildur Júlía Alexandersdóttir nýstúdent lék eigið lag á þverflautu og söng, ásamt Bjarka Steini Bjarti Jónssyni sem lék á píanó og kór nýstúdenta flutti verkið Lindin eftir Hreiðar Inga. Ótrúlegir hæfileikar fylltu salinn af fallegum tónum. Til hamingju með daginn og gleðilegt sumar.

Útskrift í dag

Fri, 29 May 2026 07:30:00 +0000

Í dag, 29. maí útskrifast 127 MH-ingar frá MH. Flestir útskrifast af opinni braut eða 57, 24 af IB braut, 20 af náttúrufræðibraut, 8 af félagsfræðabraut, 5 af málabraut, 7 af listdansbraut, 4 af listmenntabraut og 2 af fjölnámsbraut. Athöfnin hefst kl. 13:00 og mæta útskriftarefnin kl. 12:40. Á meðan beðið er eftir að athöfnin hefjist munu þær Þórhildur Vala Sigurðardóttir, Ástrós Eva Einarsdóttir og Ragnheiður Helga Víkingsdóttir leika á víólu, selló og píanó. Njótið stundarinnar. Skrifstofan verður lokuð eftir hádegi.

Helga skipuð rektor MH

Thu, 21 May 2026 10:43:00 +0000

Í gær skipaði Inga Sæland Helgu Jóhannsdóttur sem rektor Menntaskólans við Hamrahlíð. Helga hefur verið settur rektor síðan Steinn Jóhannsson fór í leyfi fyrir rúmu ári síðan. Við þökkum Steini kærlega fyrir hans störf í MH og vitum, af reynslunni, að það er gott að leita til fyrri rektora um ráð. Sjá frétt á vef stjórnarráðsins. Guðmundur Arnlaugsson hefur leyst Helgu af sem konrektor þetta rúma ár og Alda Kravec hefur leyst hann af sem IB-stallari, bæði við góðan orðstír

Próflok, sýnidagur prófa og staðfestingardagur

Mon, 18 May 2026 15:19:00 +0000

Nú er prófum lokið hjá langflestum MH-ingum og kennarar sitja sveittir við að ganga frá einkunnum. Opnað verður fyrir einkunnir í Innu miðvikudaginn 20. maí kl. 16.00.

Eden valin í Ólympíulið Íslands í líffræði

Mon, 04 May 2026 12:30:00 +0000

MH-ingurinn Eden Mayim Gittler tók þátt í Landskeppni í líffræði ásamt 184 öðrum á dögunum. Eden stóð sig hins vegar svo vel að hún hefur verið valin í ólympíulið Íslands og mun taka þátt í Ólympíuleikunum í líffræði í Vilníus í sumar ásamt þremur öðrum! Vel gert segjum við og til hamingju Eden

Stjórn NFMH

Fri, 01 May 2026 19:48:00 +0000

Á hverju vori eru kosningar til stjórnar NFMH og ýmissa ráða sem halda utanum félagslíf hvers vetrar. Við þökkum gömlu stjórninni kærlega fyrir samstarfið og óskum þeim öllum góðs gengis í framtíðinni. Að vera í kjarnastjórn NFMH er mikil ábyrgð og þau stóðu sig mjög vel. Búið er að kjósa nýja kjarnastjórn fyrir veturinn 2026 - 2027 og tekur Halldór Gauti Tryggvason við keflinu af Daníel Þresti Pálssyni sem forseti NFMH. Við óskum nýju stjórninni til hamingju og hlökkum til samstarfsins í vetur.

Þýskuþraut

Wed, 29 Apr 2026 12:50:00 +0000

Nemendur MH stóðu sig sérstaklega vel í þýskuþrautinni á dögunum. 150 nemendur tóku þátt á getustigi 1 frá 9 skólum. Lóa Margrét Gunnarsdóttir varð í fyrsta sæti og vann ferð á Eurocamp í sumar í Þýskalandi frá 20.-30.7. Maja Kornelia Cur varð í fimmta sæti og fékk bókaverðlaun frá þýska sendiráðinu og Hlynur Freyr Stefánsson varð í sjöunda sæti og fékk bókaverðlaun frá þýska sendiráðinu. 37 nemendur tóku þátt á getustigi 2 frá 7 skólum og var það nemandi frá MH, Ragnheiður (Robin) Andrésdóttir sem fékk fyrstu verðlaun og vann ferð á Eurocamp í sumar í Þýskalandi frá 20.-30.7. Einnig var stuttmyndakeppni og þar hrepptu þær Askja Lilja Finze og María Dís Gunnarsdóttir fyrstu verðlaun og fengu peningaverðlaun og bíómiða frá Félagi þýskukennara. Við óskum þeim öllum til hamingju með árangurinn.

Skuggakosningar í MH - #égkýs

Wed, 29 Apr 2026 09:51:00 +0000

Nú standa yfir skuggakosningar í flestum framhaldsskólum landsins á vegum lýðræðisátaksins #égkýs. MH tekur þátt að vanda og skipa meðlimir Lýðráðs kjörstjórn skólans. Við hvetjum alla MH-inga til að nýta kosningaréttinn í dag. Kosið er á sviðinu á Matgarði og er kjörstaðurinn opinn til kl. 16.

Tónverkakeppni

Wed, 29 Apr 2026 07:34:00 +0000

Afmælisnefnd í samvinnu við Beneventumsjóð hefur ákveðið að efna til samkeppni um tónverk fyrir Kór Menntaskólans við Hamrahlíð, samið við ljóð eftir núverandi eða fyrrum nemendur skólans. Þátttakendur velja úr fimm ljóðum en höfundar þeirra eru: Gerður Kristný, Guðrún Lilja Ólafsdóttir, Hallgrímur Helgason, Lofn og Sóley Mjöll Ásgeirsdóttir. Ljóðin og nánari upplýsingar um keppnina má finna hér. Skilafrestur tónverka er til 14. ágúst.