Menntaskólinn við Hamrahlíð

NHMH og Beneventumsjóður

Wed, 15 Apr 2026 12:50:00 +0000

Í tilefni þess að Menntaskólinn við Hamrahlíð verður 60 ára næsta haust hefur afmælisins minnst með ýmsum hætti og umfangsmikil afmælisdagskrá verður laugardaginn 26. september. Takið þann dag endilega frá. Nemenda- og hollvinasamtökin NHMH og Beneventumsjóður freista þess að styðja skólann á afmælisárinu. Það gerist bæði með þátttöku í undirbúningi afmælisins og fjárhagslegum stuðningi í gegnum Beneventumsjóðinn. Meðal annarra verkefna er stuðningur við innra starf skólans sem og skipulag og fegrun lóðar og umhverfis skólans þar sem komið verður fyrir listaverkum í eigu hans.

Tónleikaferð kórs MH um Norðurland

Tue, 14 Apr 2026 16:58:00 +0000

Kór Menntaskólans við Hamrahlíð leggur upp í langferð föstudaginn 17. apríl kl. 8:30. Ferðinni er heitið norður í land. Aðgangur að tónleikunum er ókeypis.

Sigrún Ásta keppir fyrir hönd MH í Söngkeppni framhaldsskólanna

Wed, 08 Apr 2026 16:39:00 +0000

Laugardaginn 11. apríl nk. verða úrslit Söngkeppni framhaldsskólanna sýnd í beinni útsendingu á RÚV. Útsendingin hefst klukkan 20:45 og verður fulltrúi MH Sigrún Ásta Magnúsdóttir. Sigrún Ásta er með númerið 900-9119 og hvetjum við öll til að kjósa með hjartanu. Við óskum Sigrúnu Ástu góðs gengis á laugardaginn.

Rekstrarstjóri í Sómalíu

Fri, 27 Mar 2026 15:57:00 +0000

Ellý okkar sem hefur starfað í matsölu nemenda í yfir 20 ár er að kveðja og þess vegna auglýsir NFMH eftir rekstrarstjóra í Sómalíu. Auglýsinguna má finna á starfatorgi. Vonandi er önnur "Ellý" þarna úti handa okkur. Þetta er ótrúlega skemmtilegt starf.

Páskafrí

Fri, 27 Mar 2026 15:42:00 +0000

Í dag var síðasti kennsludagur fyrir páska og nemendur og starfsfólk er farið í páskafrí. Við mætum öll hress og kát aftur miðvikudaginn 8. apríl. Gleðilega páska

MH er mannréttindaskóli ársins 2025 hjá Amnesty International

Fri, 27 Mar 2026 11:37:00 +0000

MH er sigurvegari framhaldsskólakeppninnar um Mannréttindaskóla ársins 2025 og safnaði flestum undirskriftum fyrir mannréttindaátakið "Þitt nafn bjargar lífi". Af því tilefni bauð Íslandsdeild Amnesty International nemendum skólans upp á bollakökur og afhentu nemendafélagi skólans farandbikar og viðurkenningarskjal. Hjartanlega til hamingju nemendur og NFMH.

Skólahald færist á Innu í dag 26. mars

Wed, 25 Mar 2026 15:00:00 +0000

Appelsínugula viðvörunin er í fullum gangi og því miður verður skólahald ekki í húsnæði MH í dag. Skólahald færist yfir á Innu. Skoðið vel skilaboð kennaranna ykkar og nýtið tímann vel til góðra verka

Heimsókn frá japönskum framhaldsskólanemum

Wed, 25 Mar 2026 14:04:00 +0000

Nemendur við Shibaura Institute of Technology Kashiwa Junior og Senior High School kíktu í heimsókn í MH á dögunum. Nemendur MH sem leggja stund á japönsku tóku á móti þeim og sýndu þeim skólann og gáfu þeim íslenskt snakk. Takk fyrir heimsóknina.

Appelsínugul viðvörun 26. mars milli kl. 7:00 og 13:00

Wed, 25 Mar 2026 07:54:00 +0000

Á morgun fimmtudaginn 26. mars er gert ráð fyrir appelsínugulri viðvörun á höfuðborgarsvæðinu. Suðaustan 18-25 m/s og vindhviður staðbundið yfir 35 m/s. Einnig má búast við talsverðri snjókomu með slæmu skyggni og versnandi færð. Við munum fylgjast með og láta ykkur vita bæði hér á heimasíðunni og í gegnum tölvupóst hver viðbrögðin verða, ekki seinna en kl. 6:45 á fimmtudagsmorgun. Ef ekki hefur orðið af óveðri eða ófærð verður skólahald óbreytt. Ef veðurspá eða ófærð gekk eftir færist skólahald yfir á Innu og þar gefa kennarar fyrirmæli um hvernig nemendur geta best varið tíma sínum í viðkomandi áfanga. Ekki er endilega gert ráð fyrir netkennslu, hver kennari ákveður hvernig tími nemenda nýtist sem best. Kennarar bera ábyrgð á að setja tilkynningu inn á Innu og nemendur bera ábyrgð á að fylgjast með. Annað starfsfólk vinnur fjarvinnu eftir því sem við á og mögulegt er. Nánar má lesa um verklagið á heimasíðunni

Efnafræðikeppni framhaldsskólanna

Thu, 19 Mar 2026 22:42:00 +0000

Fannar Smári Jóhannsson nemandi í MH náði þeim frábæra árangri að vera í öðru sæti í úrslitakeppninni í Efnafræði. Hann var jafnframt efstur í verklega hluta keppninnar (tilraunum) með 35,34 stig af 40. Fannar Smári mun því vera í fjögurra nemenda landsliði Íslands í efnafræði sem tekur þátt í 9. Norrænu Ólympíukeppninni í efnafræði sem haldin verður í Helsinki í Finnlandi 6.-9. júlí og 58. Alþjóðlegu Ólympíukeppninni í efnafræði sem haldin verður í Tashkent í Úsbekistan 10.-19. júlí í sumar.Til hamingju Fannar Smári.

Próftafla vorannar

Mon, 16 Mar 2026 07:49:00 +0000

Próftaflan hefur verið opnuð á Innu og hana má jafnframt finna á heimasíðu skólans. Athugið að ef þið eruð skráð í tvö próf á sama tíma þurfið þið að sækja um að fá taka annað sem sjúkrapróf. Eins megið þið sækja um að taka sjúkrapróf í einu fagi ef þið eruð skráð í tvö próf á sama degi. Sækja þarf um tilhliðrun á próftöflu fyrir 27. mars. Nemendur sem telja sig þurfa sérúrræði eins og t.d. lituð blöð, ræða um það við náms- og starfsráðgjafa skólans.

Nemendur MH komu, sáu og sigruðu á spænskuhátíð

Fri, 13 Mar 2026 14:32:00 +0000

Spænskuhátíð, í samstarfi við Sendiráð Spánar á Íslandi, Félag spænskukennara og Háskóla Íslands, var haldin í Veröld - húsi Vigdísar föstudaginn 13. mars

Nordplus Junior verkefni veturinn 2026 - 2027

Fri, 13 Mar 2026 14:15:00 +0000

Langar þig að taka þátt í spennandi alþjóðlegu samstarfsverkefni og ferðast til Finnlands? MH tekur þátt í Nordplus Junior verkefni í samstarfi við menntaskólann Helsinki Upper Secondary School of Languages í Helsinki. Verkefnið fjallar um jarðfræði og umhverfismál og ber heitið: Geological Formations: Impact of the Past, Present and Future in Nordic Countries. Í verkefninu verður unnið að fjölbreyttum og skilgreindum viðfangsefnum ásamt vettvangsferðum og heimsóknum. Nánari upplýsingar veita jarðfræðikennarar skólans og einnig hefur hlekkur á umsóknareyðublað verið sendur til nemenda.

MH er Unesco-skóli

Thu, 12 Mar 2026 14:18:00 +0000

Menntaskólinn við Hamrahlíð fagnar því að félag Sameinuðu þjóðanna á Íslandi hafi formlega boðið okkur velkomin í hóp UNESCO-skóla á Íslandi. UNESCO-skólar eru hluti af alþjóðlegu samstarfsneti skóla, ASPnet (sem starfar undir merkjum UNESCO, mennta-, vísinda- og menningarmálastofnunar Sameinuðu þjóðanna). Netið, sem var stofnað árið 1953, nær til þúsunda skóla í yfir 180 löndum og leggur áherslu á að efla alþjóðlega borgaravitund, sjálfbæra þróun, menningarlegan fjölbreytileika og menningu friðar og ofbeldisleysis. Með inngöngu í UNESCO-skólanetið skuldbindur MH sig til að vinna markvisst að verkefnum sem tengjast heimsmarkmiðum Sameinuðu þjóðanna, mannréttindum, alþjóðasamvinnu og starfsemi Sameinuðu þjóðanna. Slík verkefni eru oft þverfagleg og veita nemendum tækifæri til að tengja námið við áskoranir samtímans. Með því að gerast Unesco-skóli getum við í MH aukið fjölbreytni í kennsluaðferðum og þekkingu nemenda á málefnum Sameinuðu þjóðanna og heimsmarkmiðunum. Lesa má fréttatilkynningu á vef Unesco á Íslandi.

Heimsókn sérkennara frá Spáni

Wed, 11 Mar 2026 14:55:00 +0000

Hópur sérkennara frá Spáni kom og heimsótti fjölnámsbraut MH dagana 10. og 11. mars. Þau halda svo áfram för um höfuðborgarsvæðið og heimsækja sérnámsbrautir í nokkrum framhaldsskólum sem og Klettaskóla. Gaman að taka á móti þeim.

MH-ingurinn Agnes Matthildur sigraði með yfirburðum á Íslandsmótinu í klifri

Wed, 11 Mar 2026 13:49:00 +0000

Birgir Óli og Agnes Matthildur Íslandsmeistarar í klifri Íslandsmótið í grjótglímu í klifri fór fram í Hafnarfirði í 10. mars. Þar kepptu átta bestu karlarnir og konurnar í krefjandi keppni. Sigurvegarar á mótinu voru Birgir Óli og MH-ingurinn Agnes Matthildur Folkman.

Valvika stendur yfir

Wed, 11 Mar 2026 10:01:00 +0000

Nú stendur yfir valvika fyrir haustönn 2026. Föstudaginn 13. mars geta nemendur hitt umsjónarkennara sína og fengið aðstoð við áfangaval. Síðasti dagur til að skrá val er mánudagurinn 16. mars 2026.

Leikfélag NFMH frumsýndi Djúpt inn í skóg

Sun, 08 Mar 2026 11:14:00 +0000

Föstudagskvöldið 6. mars frumsýndi leikfélag MH söngleikinn Djúpt inn í skóg eftir Stephen Sondheim. Undirbúningur sýningarinnar hefur staðið síðan í haust, undir styrkri stjórn Gunnars Björns Guðmundssonar leikstjóra og Gunnlaugs Bjarnasonar tónlistarstjóra. Óhætt er að segja að áhorfendur hafi verið hæstánægðir með sýninguna og geta þau sem eiga miða á næstu sýningar látið sig hlakka til. Að baki sýningunni liggur þrotlaus vinna ótal nemenda við allt sem henni tengist, bæði á sviði og baksviðs, sem og í markaðssetningu og við hönnun alla. Við óskum þeim öllum hjartanlega til hamingju. Næsta sýning er sunnudaginn 8. mars. Miða og nánari upplýsingar um sýningartíma má nálgast á Tix.is (https://tix.is/event/21074/djupt-inn-i-skog).

Borgarstjórinn í heimsókn

Thu, 05 Mar 2026 13:47:00 +0000

Heiða Björg Hilmisdóttir borgarstjóri kíkti í heimsókn á miðvikudaginn af tilefni hverfadaga í Reykjavík. Hún rölti með stjórnendum um húsið og heilsaði upp á nemendur. Gaman að sjá hversu vel nemendur tóku á móti henni og voru tilbúnir að ræða við hana um skólann og lífið.Takk fyrir komuna til okkar.

Starfsþróunardagur framhaldsskólanna

Thu, 26 Feb 2026 17:24:00 +0000

Föstudaginn 27. febrúar verður starfsþróunardagur hjá starfsfólki framhaldsskólanna og erum við í MH að taka á móti kennurum í erlendum tungumálum. Skrifstofa skólans verður lokuð og kennsla fellur niður.