Áherslur í umhverfismennt
Markmið skólans er að efla umhverfisvitund. Í því felst m.a.
- að stuðla að ábyrgri afstöðu til náttúrulegra gæða og auðlindanýtingar,
- að glæða skilning á vistkerfum og sjálfbærri þróun,
- að skapa tækifæri til útivistar í íslenskri náttúru,
- að tengja umhverfismál við sögu og menningu þjóðarinnar,
- að hvetja til góðrar umgengni um náttúru, híbýli og nánasta umhverfi.
Leiðir skólans að þessum markmiðum felast einkum í völdum námsþáttum kjarnaáfanga í náttúrufræði og fyrirkomulagi lífsleikniáfangans LÍL111. Þann áfanga taka nemendur um miðbik námsins og er hann samvinnuverkefni kennara í jarðfræði, líffræði og sögu. Þar er lögð áhersla á samspil manns og náttúru í fortíð, nútíð og framtíð. Farin er dagsferð á Þingvallasvæðið og margvíslegar athuganir gerðar bæði á hinu manngerða umhverfi og náttúrulega. Öllu starfsfólki skólans er uppálagt að sýna gott fordæmi og leiðbeina um góða umgengni í skólanum og í ferðum á vegum hans.
